Бухоро вилояти Қоракўл туман ИИБга Қораун қишлоғида яшовчи «Бойли бобо» фермер хўжалиги раҳбари Қ.Х. ариза билан мурожаат қилди, деб хабар беради вилоят ИИБ матбуот хизмати.
Фуқаро ўз аризасида Янгизамон қишлоғида яшовчи, Янгизамон МФЙ раиси, 1967 йилда туғилган Ш.И. ҳамда Камолот МФЙ Камолот қишлоғида яшовчи «Қоракўл-Қораун» сувдан фойдаланувчилар уюшмаси раҳбари 1973 йилда туғилган Р.А. билан олдиндан жиноий тил бириктириб, Қораун МФЙ ҳудудидаги «Бойли бобо» ф/х раҳбари Қ.Х.нинг ишончига кириб, унга тегишли фермер хўжалиги далаларида етиштирилган буғдой ҳосилини туман МТП томонидан бириктирилган комбайнлар билан қисқа муддатда ўрдириб бериш ва фермер хўжалигига белгиланган мажбуриятга асосан 10 фоизлик буғдойни давлатга топширтирмаслик эвазига таъмагирлик йўли билан 400 долларни пора тариқасида талаб қилганлигини билдиради.
Ходимлар томонидан олиб борилган тезкор тадбирлар давомида «Қоракўл-Қораун» сувдан фойдаланувчилар уюшмаси раҳбари Р.А. кимёвий ишлов берилган 200 АҚШ доллари ва 1 600 000 сўм пулларни олган вақтда ушланиб, ушбу ҳолат тегишли тартибда расмийлаштирилган.
Мазкур ҳолат юзасидан Р.А. ва Ш.И.ларга нисбатан Жиноят Кодексининг 168-моддаси (фирибгарлик) 3-қисми ва 211-моддаси 1-қисми билан жиноят иши қўзғатилган.
Изоҳ (0)