Журналистлар ижодий уюшмаси Фарғона вилоят бўлими Матбуот марказида Фарғона шаҳридаги секторлар фаолияти таҳлилига бағишланган матбуот анжумани бўлиб ўтди. Бу ҳақда Журналистлар ижодий уюшмаси Фарғона вилоят бўлими масъул ходими Умидахон Мирзаматова хабар берди.
Ўзбекистон Республикаси Вазирлар Маҳкамаси қарори ва Фарғона вилояти ҳокими тасдиқлаган режага асосан ўтказилган матбуот анжуманида вилоят оммавий ахборот воситалари вакиллари, республика матбуотининг вилоятдаги мухбирлари, интернет сайтларининг шарҳловчилари иштирок этди.
Матбуот анжуманида Фарғона шаҳар ҳокими, 1-сектор раҳбари Шавкатжон Эркабоевнинг ўзига бириктирилган ҳудудни ижтимоий-иқтисодий ривожлантириш, халқ билан мулоқот қилиш, сектордаги мавжуд муаммо-камчиликлар ҳамда уларни бартараф этиш юзасидан кўрилаётган чора-тадбирлар юзасидан ахборот бериши режалаштирилган эди. Бироқ бир неча бор ёзма ва оғзаки тарзда таклиф этилишига қарамасдан, шаҳар ҳокими Шавкатжон Эркабоев мазкур матбуот анжуманида қатнашиш ва журналистларни қизиқтирган саволларга жавоб беришни истамади.
Маълумот учун, республика Ҳисоб палатаси вакилларидан иборат ишчи гуруҳи Фарғона шаҳридаги 4 та сектор фаолиятини ўрганиши ортидан маҳаллий телевидение, ЎзА ва «Дарё» интернет нашрида шаҳар ҳокими Шавкатжон Эркабоев масъул бўлган сектордаги мавжуд камчиликлар ва аҳоли муаммолари юзасидан танқидий мақолалар эълон қилинган эди.
Матбуот анжуманида «Ёшлар – келажагимиз» Давлат дастури ижросини таъминлашда ОАВларининг олдида турган бирламчи вазифалар белгилаб олинди. Давлат дастури тарғиботини самарали йўлга қўйиш учун Ўзбекистон Журналистлари ижодий уюшмаси Фарғона вилоят бўлими ташаббуси билан янги ахборот веб-сайтини очишга келишиб олинди.
Изоҳ (0)