Тошкентда 200 доллар эвазига жой ажратиб беришни ваъда қилган бозор раҳбари ушланди

Тошкент шаҳридаги деҳқон бозорларидан бирининг хавфсизлик бўйича директор ўринбосари тадбиркорга ноқонуний тўлов эвазига бозор растасидан яхна ичимликлар савдоси учун жой ажратиб беришни ваъда қилди. Бу ҳақда ИИББ матбуот хизмати хабар берди.

ИИББ Иқтисодий хавфсизлик ва коррупцияга қарши курашиш бўлими ходимлари амалга оширган тезкор ҳаракатлар натижасида 63 ёшли Т.Абдували 200 доллар олаётган вақтда воқеа жойида ушланди.

Бош прокуратура ҳузуридаги Иқтисодий жиноятларга қарши курашиш департаменти томонидан ушбу шахсга нисбатан Жиноят кодексининг 168-моддаси («Фирибгарлик») ва 211-моддаси («Пора бериш») билан жиноий иш қўзғатилди.

Тергов ишлари давом этмоқда.