Наманган муҳандислик-технология институти олимларидан иборат делегация Россияда бир ҳафталик сафарда бўлди. Бу ҳақда ЎзА саҳифаларида журналист Оқилхон Дадабоев маълум қилди.
Институтнинг ўқув ишлари бўйича проректори Ойбек Эргашев, муҳандислик-технологиялари факультети декани Камолиддин Маткаримов, саноат ишлаб чиқаришни ташкил этиш ва иқтисоди кафедраси мудири Равшанжон Исмоилов Тюмень вилоятига сафари давомида Сургут давлат университетида бўлди.
1993 йилда ташкил топган Сургут давлат университети Россиядаги нуфузли таълим даргоҳларидан ҳисобланади. Политехника, табиий фанлар, юридика, иқтисодиёт ва бошқарув, тиббиёт йўналишларини ўзида қамраб олган мазкур олий ўқув юртида 5 та институт фаолият юритади. Университетда 10 мингдан зиёд талаба 20 га яқин мутахассислик бўйича таҳсил олади.
Университет жойлашган Сургутда нефть-газ саноати ривожланган бўлиб, ҳудуд Россия ялпи ички маҳсулотининг 27 фоизини таъминлайди. Қолаверса, бу шаҳарда дунёдаги энг йирик гидроэлектр станциялар жойлашган, улар қуввати ва кўлами жиҳатидан жаҳонда иккинчи ўринда туради.
Ташриф давомида икки олий таълим даргоҳлари ўртасида профессор-ўқитувчилар, аспирант-докторантлар ва талабалар ўртасида тажриба алмашиш, биргаликда илмий-тадқиқот ишларини олиб бориш, ўқув-услубий қўлланма ва дарсликлар яратиш, икки томонлама илмий-амалий конференциялар ташкил этиш бўйича меморандум ва келишувлар имзоланди.
Шартномага асосан, иқтисодиёт, муҳандислик технологиялари, электр энергетикаси, автоматика, информатика, кимё технологиялари таълим йўналишлари бўйича амалий ҳамкорлик ўрнатилади.
Эришилган келишувларнинг дастлабки самараси сифатида университет томонидан Наманган муҳандислик-технология институтига иқтисодиёт ва технологияга оид 200 га яқин электрон ўқув адабиётлари тақдим этилди. Келгусида Сургут давлат университети делегациясининг Наманганга ташриф буюриши ҳам кўзда тутилмоқда.
Изоҳ (0)