Японияда зилзила оқибатида 3 киши ҳалок бўлди

Япония ҳукумати зилзила натижасида 3 кишининг ҳалок бўлганини маълум қилди. Бу ҳақда 18 июнь, душанба куни NHK телеканали хабар қилди.

Маълумотларга қараганда, Такацуки шаҳрида 9 ёшли қизни мактаб ҳовузи олдидаги девор босиб қолган. Шунингдек, Осака шаҳри ва Хигасиедогава даҳасида 2 нафар эркак ҳалок бўлган.

50 дан ортиқ кишининг жабр кўргани хабар қилинган. Зилзила келтириб чиқарган вайронагарчиликлар ҳақида ҳозирча маълумот тақдим этилмаган. Цунами хавфи эълон қилинмаган. Зилзила авиация ва темир йўл транспорти фаолиятига таъсир кўрсатган. Япония жануби-ғарбидаги оддий ва тезюрар поездлар қатнови тўхтатилган.

Зилзила мамлакат ғарбидаги Осака префектурасида қайд этилган. Метеорология хизмати берган маълумотларга қараганда, зилзила магнитудаси Рихтер шкаласи бўйича 6.1 баллни ташкил қилган.

2017 йил 25 июнь куни Японияда 5,7 магнитудали зилзила юз берган. Жабр кўрганлар ва вайронагарчиликлар ҳақида хабар қилинмаган. 2016 йил 15—16 апрель кунлари Япония жануби-ғарбида бир неча маротаба ер силкинишлари қайд этилган, энг кучли зилзиланинг магнитудаси 7,3 баллни ташкил қилган. 40 дан ортиқ киши ҳалок бўлган, 2 мингга яқин киши жабр кўрган.

2011 йил 11 март куни Япония тарихидаги энг кучли зилзила содир бўлган. Унинг магнитудаси 9,1 баллга тенг бўлган. Зилзила оқибатида цунами юз бериб, тўлқинлар 40 метрдан юқорига кўтарилган. Табиий офат оқибатида «Фукусима-1» АЭСда авария юз берган ва реакторларни совитиш тизими ишдан чиққан.