Марказий Осиё байкерлари «Кўчманчи йўли» халқаро мотопойгасини ташкиллаштирди
Қирғизистон мотоциклчилари уюшмаси Марказий Осиё мотоциклчилари бирлашмаси, Ўзбекистон, Қозоғистон ва Тожикистон мото клублари билан ҳамкорликда «Кўчманчи йўли» учинчи халқаро мотопойгасини ташкиллаштирди. Мотопойга иштирокчилари тўрт мамлакат — Ўзбекистон, Тожикистон, Қозоғистон ва Қирғизистон ҳудудларидан ўтган Буюк Ипак Йўли йўллари бўйлаб ҳаракатланади, деб хабар берди Sputnik.
Мотопойганинг асосий мақсади Марказий Осиёда дўстлик, ҳамжиҳатлик ва мустаҳкам оила руҳида мотомаданиятни тарғиб қилишга қаратилган.
Мотопойгачилар орасида Россиянинг Тюмень шаҳридан келган байкер-аёл Мария Якутенко ҳам бор.
«Мотопойгачилар орасида аёл-байкерларнинг борлиги бу табиий ҳол», — дея таъкидлайди пойга иштирокчиларидан бири Иляз Тулеев ва Тожикистондан ҳам улар сафига эркак байкерлар қаторида бир нафар аёл-байкер қўшилишини айтиб ўтган. Қирғизистон мотоциклчилари уюшмаси раиси Асқад Сеитбековнинг сўзларига кўра, мотопойга иштирокчилари 12 июнь куни Олмаотада тўпланган ва эртаси куни йўлга чиққан. Куни кеча улар Тошкент шаҳрига етиб келган.
«Ушбу мотопойга Қирғизистонда ўтадиган Бутунжаҳон Кўчманчилар ўйинларига бағишланади. Ушбу акция орқали турли давлатлардаги интернет тармоғи, ижтимоий саҳифалар фойдаланувчилари ўзига хос олимпия ўйинлари бўлган Бутунжаҳон Кўчманчилар ўйинлари, бу ўйинларнинг аҳамияти ҳақида хабардор бўладилар. Ўзбекистон ҳукуматига эса бизга кўрсатган ёрдамлари учун барча байкерлар номидан ташаккур изҳор қиламан», — дейди Сеитбеков.
Ўттиз етти нафар мотопойгачилар бугун Тошкент шаҳридан Самарқандга қараб йўл олди.
Самарқанддан сўнг улар Тожикистоннинг Душанбе, Хўжанд шаҳарларидан ўтади ва Ўшга кириб боради. Сўнгра байкерлар «Токтогул—Бишкек—Иссиқкўл» маршрути бўйлаб ҳаракатланади. Ҳар бир шаҳарда уларнинг сафи кенгайиб бораверади.
Мотопойгачилар ўз маршрутини 24 июнь куни Иссиқкўлда бўлиб ўтадиган «Қирғизистон гавҳари» халқаро Байк Фест байрами арафасида якунига етказишни режалаштирган.
