Edem Chimgan’га нисбатан очилган иш жиноят аломатлари аниқланмагани сабабли тугатилди. Меҳмонхона одатий тартибда ишини давом эттирмоқда

Жорий йилнинг март ойида Тошкент вилояти Юқори Чирчиқ туманидаги Edem Chimgan меҳмонхонасига нисбатан ЖКнинг 131-моддаси 2-қисми бўйича очилган иш жиноят аломатлари аниқланмагани сабабли тугатилди.

13 март куни меҳмонхонада эркак ва аёлларнинг кўнгилхушлик қилиб бериши учун шароит яратиб берилаётгани ҳақидаги хабар келиб тушгач, Тошкент вилояти ИИБ тезкор тадбир ўтказганди. Меҳмонхона раҳбариятига нисбатан Жиноят кодексининг 131-моддаси 2-қисми (фоҳишахона ташкил этиш ёки сақлаш) билан жиноят иши қўзғатилганди.

Юқори Чирчиқ тумани ИИБ ҳузуридаги Тергов бўлими томонидан олиб борилган тергов давомида меҳмонхона раҳбариятининг ҳаракатларида жиноят аломатлари аниқланмади. Шу сабабли Юқори Чирчиқ тумани ИИБ ҳузуридаги Тергов бўлими 1 май куни Жиноят-Процессуал кодексининг 83-моддаси 2-бандига асосан ишни тугатди.

Ҳозирда меҳмонхона мажмуаси одатий тартибда ўз фаолиятини давом эттирмоқда.