Сурхондарё вилоятида Рамазон ҳайитини тинч ва кўтаринки руҳда муносиб нишонлашга пухта ҳозирлик кўрилмоқда. Шу мақсадда байрамни тартибли, халқнинг миллий-диний қадриятларига мос ўтказиш юзасидан зарур чора-тадбирлар белгиланди, деб ёзади ЎзА.
Давлат раҳбари ташаббуси билан реконструкция қилинган ва ҳудудида янги масжид барпо этилган Шеробод туманидаги буюк муҳаддис Исо Термизий мажмуасида мўмин-мусулмонлар Рамазон ҳайити намозини адо этади. Шунингдек, дам олиш кунлари аҳоли бу масканни зиёрат қилади. Шу сабабли мажмуа атрофида кенг кўламли ободонлаштириш юмушлари бажарилди. Анвойи гуллар экилиб, дарахтларга шакл берилди. Ариқлар тозаланиб, ҳудуддаги қабристон тартибга келтирилди.
Термиз шаҳридаги Ҳаким Термизий мажмуасида ҳам байрамолди ободонлаштириш ишлари якунланмоқда. 10 гектар майдондан иборат мажмуада 37 ишчи дарахтларга шакл бериш, турли анвойи гулларни парваришлаш, йўлакчаларни тозалаш каби юмушларни сифатли амалга оширмоқда.
Маълумотларга кўра, Термиз туманидаги Султон Саодат ёдгорлиги, Олтинсой туманидаги Сўфи Оллоёр, Жарқўрғон туманидаги Самандар Термизий каби зиёратгоҳларда ҳам ободонлаштириш ишлари юқори савияда ташкил этилган.
Изоҳ (0)