Самарқанд шаҳрида бундан бир аср олдин қурилган почта биноси бузилаётгани ҳақида ижтимоий тармоқлар ва интернет нашрларида хабарлар тарқалганди. Бу ҳақда «Зарафшон» маълум қилди.
«Ўзбекистон почтаси» Самарқанд туманлараро боғламаси бошлиғи Ш.Аҳмедов ҳолат юзасидан шундай маълумот тақдим этди:
«Мазкур ҳудудда Самарқанд давлат тиббиёт институтининг 800 ўринли ўқув биноси қурилади. Ушбу бинонинг қурилиши маданий-тарихий ҳисобланган почта биносидан 12 метр олисда олиб борилади. Қурилиш ишларининг тарихий бинога ҳеч қандай таъсири йўқ. Иккинчидан, ўқув биносининг бир қисми қурилиши режалаштирилган хат-хабар алмашинуви биноси тарихий-маданий обида сирасига кирмайди. Шаҳар почтаси фаолияти учун яқин кунларда ҳозиргиданда яхшироқ шароитга эга бошқа бино берилади».
Бузилиши режалаштирилган бино маданий-тарихий иншоот эмаслиги ҳақида Маданий мерос объeктларини муҳофаза қилиш ва улардан фойдаланиш илмий ишлаб чиқариш бош бошқармаси Самарқанд ва Жиззах вилоятлари бўйича минтақалараро давлат инспекциясининг ҳам хулосаси бор.
Хуллас, бузилаётган бино – Мироншоҳ Мирзо кўчаси, 19-уй тарихий бино эмас. Бироқ айни шу ҳудуддаги Мустақиллик кўчаси, 28-манзил ва Пушкин кўчаси, 3-уй тарихий бино ҳисобланади. Уларнинг бузилиш хавфи йўқ.
Изоҳ (0)