Ўзбекистон Президенти Шавкат Мирзиёев Хитой Халқ Республикасига ташрифи чоғида кимлар билан учрашиши, қандай тадбирларда иштирок этиши ҳақида давлат раҳбарининг матбуот котиби Комил Алламжонов Хитойнинг Циндао шаҳрида бўлиб ўтган брифингда маълумот берди.
«Хабарингиз бор, 9—10 июнь кунлари бу ерда Шанхай ҳамкорлик ташкилотига аъзо мамлакатлар Давлат раҳбарлари кенгашининг навбатдаги саммити бўлиб ўтади. Саммитда Ўзбекистон Республикаси Президенти Шавкат Мирзиёев ҳам иштирок этади. Шу муносабат билан сизларга, сизлар орқали бутун халқимизга давлатимиз раҳбарининг кун тартиби ҳақида маълумот бериб ўтмоқчиман», — дея журналистларга юзланди Комил Алламжонов.
Унинг сўзларига кўра, Президент Шавкат Мирзиёев Циндаога 8 июнь куни кечга яқин етиб келади. Давлат раҳбари 9 июнь куни Хитой Халқ Республикаси Раиси Си Цзиньпин, Россия Федерацияси Президенти Владимир Путин ҳамда Ҳиндистон Республикаси Бош вазири Нарендра Моди билан икки томонлама учрашувлар ўтказади.
Шанхай ҳамкорлик ташкилоти саммитининг асосий тадбирлари 10 июнь кунига белгиланган. Бу йилги саммитнинг ўзига хос томони шундаки, у илк бор «саккизлик» форматида бўлиб ўтади.
Матбуот котиби эслатишича, 2016 йил Тошкентда Ҳиндистон Республикаси ва Покистон Ислом Республикасининг ШҲТга аъзо давлат мақомини олиш йўлидаги мажбуриятлари тўғрисида меморандумлар имзоланган, ўтган йили Остонада бу икки давлат Шанҳай ҳамкорлик ташкилотининг тенг ҳуқуқли аъзоларига айланган эди.
Циндаода ташкилотга аъзо мамлакатлар давлат раҳбарлари аввал тор доирада, кейин кузатувчи мақомидаги давлатлар етакчилари билан биргаликда кенг доирада музокаралар ўтказади. Ушбу учрашувларда сиёсат, хавфсизлик, савдо, иқтисодиёт, инвестиция ва маданий-гуманитар соҳалардаги ҳамкорликни ривожлантириш масалалари муҳокама қилинади. Музокаралар якунида қатор кўп томонлама ҳужжатлар имзоланади.
Жумладан, Циндао декларацияси қабул қилиниши, Терроризм, сепаратизм ва экстремизмга қарши курашиш бўйича 2019—2021 йилларга мўлжалланган ҳамкорлик дастури, Узоқ муддатли яхши қўшничилик, дўстлик ва ҳамкорлик тўғрисидаги шартнома қоидаларини амалга ошириш бўйича 2018—2022 йилларга мўлжалланган ҳаракатлар режаси, Ёшларга мурожаат ва бошқа ҳужжатлар имзоланиши режалаштирилган.
2018—2019 йилларда ташкилотга раислик қиладиган давлат тўғрисида қарор қабул қилиш, кейинги уч йиллик даврга ШҲТ бош котиби ва Минтақавий аксилтеррор тузилмаси Ижроия қўмитаси директори лавозимларига номзодларни тасдиқлаш кўзда тутилмоқда.
Президент Шавкат Мирзиёев шу куни Покистон Ислом Республикаси Президенти Мамнун Ҳусайн ҳамда БМТ раҳбарияти билан учрашув ўтказиши ҳам режалаштирилган.
https://www.facebook.com/Mirziyoyev/videos/1034749883355799/?t=0
Изоҳ (0)