Андижон вилоятининг туман ва шаҳарларида жорий йил 10 июнидан бошлаб намунавий тарзда «Ҳар бир оила — тадбиркор» ҳудудий дастури амалга оширилади. Бу Президент Шавкат Мирзиёевнинг «Ҳар бир оила — тадбиркор’ дастурини амалга ошириш тўғрисида»ги қарорида кўзда тутилган.
Ҳудудий дастурда кўзда тутилган вазифаларни молиявий таъминлаш мақсадларига Инвестициялар бўйича давлат қўмитаси томонидан жалб қилинадиган хорижий молия институтлари кредит линияларидан 200 миллион АҚШ доллари миқдоридаги маблағлар ажратилади.
Ташқи иқтисодий фаолият Миллий банки ушбу кредит маблағларини Андижон вилоятида фаолият юритувчи тижорат банкларига йиллик 3 фоиз тўлов шарти билан қайта молиялаштиради.
Андижон вилояти ҳокимлиги манфаатдор вазирлик, идора ва хўжалик бирлашмалари, Халқ банки билан биргаликда:
Бир ой муддатда наслли қорамол, парранда ва қуёнларни маҳаллий шароитларга мослаштирувчи махсус фермаларни ташкил этиш;
Мазкур фермаларга чет элдан маҳсулдорлиги юқори бўлган наслдор қорамол, эчки ва қуён зотларини олиб келиш, кўпайтириш ҳамда вилоятнинг табиий-иқлим шароитларига мос зотларини яратиш, молларни сунъий қочиришнинг илғор технологияларини жорий этиш;
Мазкур фермаларда маҳаллий шароитга мослаштирилган наслдор қорамол, эчки ва қуён зотларининг кўргазмаларини ташкил этиш ва аҳолихоҳишига асосан уларни танлов асосида мақбул нархларда сотиб олинишига замин яратиш;
Аҳолига махсус фермалардан сотиб олинган чорва моллари, қуён ва паррандаларни боқиш технологияларини батафсил тушунтириш ва келгусида ҳар бир хонадонда мавжуд чорва моллари ва паррандаларни вакцинация қилиш тадбирларини амалга ошириш, аҳолига наслдор молларни сунъий қочириш ва узлуксиз ветеринария хизматлари кўрсатиш тармоғини кенгайтириш;
Сифатли омихта ем ишлаб чиқариш корхоналарини ташкил қилиш борасида лойиҳа ташаббускорларига ҳар томонлама кўмаклашиш, аҳолининг йиллик эҳтиёжини ҳисобга олган ҳолда омихта ем, витаминлар, премикслар, қўшимчалар ҳамда ветеринария препаратларини етказиб бериш;
Йирик тадбиркорларни жалб этган ҳолда саноатлашган чорвачилик кластерларини ташкил этиш чораларини кўриш топширилди.
Изоҳ (0)