O‘zbekiston Prezidenti Shavkat Mirziyoyev Xitoy Xalq Respublikasiga tashrifi chog‘ida kimlar bilan uchrashishi, qanday tadbirlarda ishtirok etishi haqida davlat rahbarining matbuot kotibi Komil Allamjonov Xitoyning Sindao shahrida bo‘lib o‘tgan brifingda ma’lumot berdi.
“Xabaringiz bor, 9—10-iyun kunlari bu yerda Shanxay hamkorlik tashkilotiga a’zo mamlakatlar Davlat rahbarlari kengashining navbatdagi sammiti bo‘lib o‘tadi. Sammitda O‘zbekiston Respublikasi Prezidenti Shavkat Mirziyoyev ham ishtirok etadi. Shu munosabat bilan sizlarga, sizlar orqali butun xalqimizga davlatimiz rahbarining kun tartibi haqida ma’lumot berib o‘tmoqchiman”, — deya jurnalistlarga yuzlandi Komil Allamjonov.
Uning so‘zlariga ko‘ra, Prezident Shavkat Mirziyoyev Sindaoga 8-iyun kuni kechga yaqin yetib keladi. Davlat rahbari 9-iyun kuni Xitoy Xalq Respublikasi Raisi Si Szinpin, Rossiya Federatsiyasi Prezidenti Vladimir Putin hamda Hindiston Respublikasi Bosh vaziri Narendra Modi bilan ikki tomonlama uchrashuvlar o‘tkazadi.
Shanxay hamkorlik tashkiloti sammitining asosiy tadbirlari 10-iyun kuniga belgilangan. Bu yilgi sammitning o‘ziga xos tomoni shundaki, u ilk bor “sakkizlik” formatida bo‘lib o‘tadi.
Matbuot kotibi eslatishicha, 2016-yil Toshkentda Hindiston Respublikasi va Pokiston Islom Respublikasining ShHTga a’zo davlat maqomini olish yo‘lidagi majburiyatlari to‘g‘risida memorandumlar imzolangan, o‘tgan yili Ostonada bu ikki davlat Shanhay hamkorlik tashkilotining teng huquqli a’zolariga aylangan edi.
Sindaoda tashkilotga a’zo mamlakatlar davlat rahbarlari avval tor doirada, keyin kuzatuvchi maqomidagi davlatlar yetakchilari bilan birgalikda keng doirada muzokaralar o‘tkazadi. Ushbu uchrashuvlarda siyosat, xavfsizlik, savdo, iqtisodiyot, investitsiya va madaniy-gumanitar sohalardagi hamkorlikni rivojlantirish masalalari muhokama qilinadi. Muzokaralar yakunida qator ko‘p tomonlama hujjatlar imzolanadi.
Jumladan, Sindao deklaratsiyasi qabul qilinishi, Terrorizm, separatizm va ekstremizmga qarshi kurashish bo‘yicha 2019—2021-yillarga mo‘ljallangan hamkorlik dasturi, Uzoq muddatli yaxshi qo‘shnichilik, do‘stlik va hamkorlik to‘g‘risidagi shartnoma qoidalarini amalga oshirish bo‘yicha 2018—2022-yillarga mo‘ljallangan harakatlar rejasi, Yoshlarga murojaat va boshqa hujjatlar imzolanishi rejalashtirilgan.
2018—2019-yillarda tashkilotga raislik qiladigan davlat to‘g‘risida qaror qabul qilish, keyingi uch yillik davrga ShHT bosh kotibi va Mintaqaviy aksilterror tuzilmasi Ijroiya qo‘mitasi direktori lavozimlariga nomzodlarni tasdiqlash ko‘zda tutilmoqda.
Prezident Shavkat Mirziyoyev shu kuni Pokiston Islom Respublikasi Prezidenti Mamnun Husayn hamda BMT rahbariyati bilan uchrashuv o‘tkazishi ham rejalashtirilgan.
https://www.facebook.com/Mirziyoyev/videos/1034749883355799/?t=0
Izoh (0)