Бугун,

  • USD 11014.01
  • RUB 191.8
  • EUR 10674.78

Инновацион ривожланиш вазирлиги ва БМТ Тараққиёт Дастури ҳамкорлигида «Ўзбекистоннинг инновацион ривожланишда танлаган йўли» мавзусида давра суҳбати ўтказилди. Бу ҳақда ЎзА хабар бермоқда.

Фото: ЎзА

Фото: ЎзА

Унда Ўзбекистоннинг инновацион тараққиёти йўналишларини аниқлаб берувчи асосий ҳужжатлардан бири — Инновацион ривожланиш стратегиясини ишлаб чиқиш эътибор марказида бўлди. Стратегиянинг асосий мақсади инновацион ривожланиш йўлига ўтиш орқали жамият фаровонлигини мустаҳкамлаш ва барқарор тараққиётни таъминлашдан иборат.

—Президент Шавкат Мирзиёев томонидан Ўзбекистоннинг инновацион стратегиясини яратиш бўйича вазифа топширилганди, — дейди Инновацион ривожланиш вазири ўринбосари Шерзод Шерматов. — Буни оддий йўл орқали, бир хонага ҳамма экспертлар йиғилган ҳолда эрталабгача тезкорлик билан тайёрлаб беришимиз мумкин эди. Лекин биз бу йўлни танламадик. Муддат 1- апрель эди, уни суришни сўрадик ва бу муддат 1 июлга сурилди. Мақсад битта — бу ҳужжат мукаммал бўлиши ҳамда у қоғозда қолиб кетмаслиги ва амалда ҳақиқатдан ҳам ишлаши керак.

— Дунё инновацион индексидаги ҳозирги ҳолатимизни қониқарли деб бўлмайди, — деб сўзида давом этади Шерзод Шерматов. — 2015 йилдаги кўрсаткич бўйича Ўзбекистон рейтингда 122-ўринни эгаллаган. Ундан кейинги ҳисоботларда мамлакат ҳатто тушиб ҳам қолган. Сабаби, Ўзбекистон ҳақида тўлиқ маълумот бўлмаган. Рейтингнинг топ-50 давлатлари рўйхатига киришни мақсад қилганмиз, дейишимиз мумкин эди, лекин унинг барча кўрсаткичлари бўйича кўтарилиб бўлмайди. Албатта, ҳаракат қилишимиз керак, аммо ресурсларимиз чегараланган. Стратегияни ишлаб чиқиш жараёнида барча тармоқларни қамраб олишга ҳаракат қилдик.

Давра суҳбати давомида Ўзбекистон учун ривожланиш драйверлари белгиланди, стратегияни амалга оширишда юзага келиши мумкин бўлган хатарлар аниқланди ва муқобил сценарийлар ишлаб чиқилди. Шунингдек, Инновацион ривожланиш вазирлиги ва БМТ Тараққиёт дастури ҳамкорлигида «Ҳаракатлар режаси»ни тузиш ишлари бошланди.

Изоҳ
Асосий янгиликлар