Грузия пойтахти Тбилиси марказида парламент биноси ёнида тўпланган намойишчиларнинг ультиматуми муддати тугади, шу туфайли улар ўз талабларини кескинлаштиришга қарор қилди, деб ёзади «Новости-Грузия». Энди Хорава кўчасида ўлдирилган 16 ёшли ўспириннинг отаси Заза Саралидзе томонидан ташкил қилинган акция иштирокчилари Грузия ҳукумати ва бош вазири Георгий Квирикашвилининг истеъфога чиқишини талаб қилмоқда.
Намойишчилар дастлаб гумонланувчилардан бирининг отаси ҳамда иш бўйича текширув бошлангач истеъфо берган прокуратура ходими ҳибсга олинишини талаб қилган эди. Заза Саралидзенинг фикрича, айнан ўша унинг ўғлининг ўлимини хаспўшлаган ва холисона текширув олиб борилишига тўсқинлик қилган.
Шунингдек, акция иштирокчилари иш бўйича далилларни қалбакилаштирганларнинг барчасини жазолашни сўраган. Улар шафқатсиз қотилликни амалга оширганларнинг ҳаммасини аниқлаб, жазолашни ҳам талаб қилган.
Изоҳ (0)