Ўзбекистон Республикаси Президенти «Бюджет маблағларидан фойдаланиш самарадорлигини тубдан ошириш ва иқтисодий жиноятларга қарши курашиш механизмларини такомиллаштириш чора-тадбирлари тўғрисида» фармон имзолади. Унга мувофиқ, республика ҳукумати МДҲ ва бошқа мамлакатларнинг молиявий ва солиқ разведкалари билан ҳамкорликни кучайтиради, деб ёзади Sputnik.
Ҳужжат Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти фаолиятини такомиллаштириш бўйича «йўл харитаси»ни тасдиқлайди.
«Ўзбекистон Республикасининг МДҲга аъзо давлатлар солиқ (молия) текширувлари органлари раҳбарларининг мувофиқлаштирувчи кенгашига қўшилиши масаласини ишлаб чиқиш зарур», — дейилади «йўл харитаси»да. Ваколатли вазирлик ва идораларга ушбу масала бўйича комплекс чора-тадбирларни 1 июлгача ишлаб чиқиш юклатилади.
Президент Жиноий даромадларни қонунийлаштириш ва терроризмни молиялаштиришга қарши кураш бўйича Евросиё гуруҳи экспертлари томонидан Ўзбекистондаги шундай фаолиятга қарши курашиш миллий тизимининг баҳоланишини ташкил қилиш чораларини қабул қилишни буюрди.
Бундан ташқари, чора-тадбирлар дастури Ўзбекистоннинг «Эгмонт» гуруҳидаги иштироки доирасида ўз мажбуриятларини бажаришини, шунингдек, Афғонистон, Жанубий Корея, Тожикистон, Индонезия каби қатор мамлакатларнинг ваколатли органлари билан битимлар тузиш ва ахборот алмашинувини кенгайтиришни кўзда тутади.
«Эгмонт» гуруҳи — молиявий разведка бўлинмалари халқаро ташкилоти бўлиб, дунёнинг 130 дан ортиқ молиявий разведкаларини бирлаштиради.
Изоҳ (0)