Тақсимланган реестр (блокчейн) технологиялар бўйича ваколатли марказ криптовалюталар билан шуғулланмайди. Бу ҳақда Mirzo Ulugbek Innovation Center (MUIC) бош директори Фарҳод Ибрагимов маълум қилди, деб ёзади «Kommersant.uz».
Шу йилнинг февраль ойида Президент Шавкат Мирзиёев MUIC қошида Тақсимланган реестр технологиялар бўйича ваколатли марказ ташкил этилишини маъқуллади. Кўплаб оммавий ахборот воситалари буни блокчейн технологияси асосида ишловчи криптовалюталарни легаллаштиришга қаратилган сигнал сифатида қабул қилди.
«Марказнинг асосий вазифалари — блокчейн технологиясини тарқатиш учун шароитларни яратиш ва маҳаллий ишлаб чиқувчиларни қўллаб-қувватлаш. Биз криптовалюталарни ривожлантириш билан шуғулланмаймиз», — дея таъкидлади Ибрагимов.
Ўзбекистон Марказий банки криптовалюталар бўйича бир неча маротаба изоҳ бериб, уларни терроризмни молиялаштириш учун восита деб атаган. Криптовалютадан аноним фойдаланиш туфайли маблағларнинг ноқонуний айланиши ва фирибгарлик ҳолатлари ортади, бу эса, ўз навбатида, бир қатор мамлакатларда яширин иқтисодиётни ривожлантиришга хизмат қилади.
Ўзбекистонда криптовалюта мақоми аниқланмаган (уларни ишлатишга йўл қўйилмайди, аммо бу тақиқланган ҳам эмас) бўлса-да, Марказий банк аҳолига криптовалюталар билан қандайдир операциялар ўтказишни тавсия қилмайди.
Изоҳ (0)