Ўзбекистон Инновацион ривожланиш вазирининг биринчи ўринбосари Бахтиёр Умаров бошчилигидаги делегация Хитой қишлоқ хўжалиги вазирлиги вакиллари билан учрашув ўтказди, деб хабар беради вазирлик матбуот хизмати.
Инновацион ривожланиш вазирининг биринчи ўринбосари Бахтиёр Умаров суҳбат чоғида Ўзбекистон уруғлар экспорти салоҳиятини янада кучайтиришни мақсад қилганини алоҳида таъкидлади.
«Ўз навбатида Хитой қишлоқ хўжалиги вазирлиги раҳбариятининг маълум қилишича, хитой томони уруғчилик соҳасида янги тизим асосида иш олиб бормоқда. Яъни хитойлик мутахассислар уруғларни чет давлатларда ўзлари етиштириб, кейин юртларига импорт қилишмоқда. Яъни мазкур тартибда иш олиб бориш ҳар икки томон учун ҳам манфаатли бўлаётганини таъкидлашди», — дейилади хабарда.
Бахтиёр Умаров айни йўналишда хитойлик мутахасислар билан ҳамкорлик қилишга Ўзбекистон томони тайёр эканини билдириб, уруғчлик янги навларни яратиш борасидаги илмий ишларни биргаликда олиб боришни таклиф этди.
Хитой қишлоқ хўжалиги вазирлиги вакиллари мазкур таклифни илиқ қабул қилиб, Ўзбекистонга ташриф буюрадиган делегация таркибига вазирликнинг махсус ишчи гуруҳи ҳам киритиладиган бўлди. Хитой қишлоқ хўжалиги вазирлиги Ўзбекистонда уруғларнинг янги навларини яратиш, шунингдек мавжуд лабораторияларни замонавий ускуналар ва технологиялар билан жиҳозлаш борасида ҳамкорлик қилишга тайёр эканини баён қилди.
Изоҳ (0)