Тошкентнинг Миробод туманидаги поликлиника ва боғчалар ишида камчиликлар аниқланди
Қонунчилик палатаси депутатлари, Олий Мажлис Сенати аъзолари ҳамда «Халқ сўзи» газетаси мухбирлари билан биргаликда Тошкентнинг Миробод туманидаги маҳаллалар аҳволни ўрганди. Бу ҳақда «Халқ сўзи» газетасининг сайтида хабар берилди.
Илк манзил – «Баёт» маҳалласи марказдан энг четда, Қўйлиқ бозори атрофида жойлашган. Бугун бу ерда 1300 дан ортиқ аҳоли истиқомат қилади. Уларнинг асосий қисмини кўзи ожизлар ташкил этади. Шу сабабли ушбу маҳалла фуқаролари учун Orion Med City кўз касалликлари клиникаси мутахассисларининг чуқурлаштирилган тиббий кўриги ташкиллаштирилди. Офталмолог, невропатолог, гинеколог, терапевт, жарроҳ, УЗД, ЭКГ хоналари маҳалла аҳолиси учун интенсив режимда ишлади, фито-бар ташкил қилинди.
Тумандаги 2-оилавий поликлиника фаолияти ўрганилиб, муассаса ходимлари ишига салбий баҳо берилди. Тиббий дафтарчаларда кўриклар ҳақидаги қайдларнинг энг сўнггилари 2011—2015 йилларга алоқадорлиги аниқланди.
Кейинги манзил «Кўзмунчоқ» 521-мактабгача таълим муассасаси бўлди. Муассасагача бўлган йўл чиқиндилар билан тўлган, аммо бу ҳолат маҳалла аҳолиси ва масъулларининг эътиборидан четда қолган. Парламент аъзолари бу ерга уч кун олдин ҳам ташриф буюриб, бинонинг умумий аҳволи ва болаларни овқатлантириш бўйича бир қатор камчиликларни қайд қилишган эди. «Ширинтой» гуруҳида рўйхатга киритилмаган болаларнинг борлиги аниқланган. Муассасага келтириладиган озиқ-овқат маҳсулотлари алоҳида ўрганилди. Президент томонидан ўтган йили декабрда ташкиллаштирилган видеоселекторда жорий йилнинг 10 январига қадар мактабгача таълим муассасаларида овқат тайёрлаш жараёнини назорат қилиш учун видеокузатув камералари ўрнатилиши шартлиги айтилган. Бироқ «Кўзмунчоқ»да бундай иш ҳали йўлга қўйилмаган.
