Тошкент шаҳар Мирзо Улуғбек туманидаги хонадонлардан бирига уч нафар номаълум шахс қуролланган ва юзларини ниқоб билан беркитган ҳолда бостириб кирди, деб хабар берди «Darakchi.uz».
Тошкент шаҳар ИИББ 102 хизмат рақам хизматига келиб тушган хабар аососида тергов тезкор гуруҳи воқеа жойига етиб борган.
«Уч нафар номаълум шахс юзларига ниқоб кийган ҳолда уй эгаси Аҳмедовага зўрлик ишлатиб, уни ўлдириш билан қўрқитаётган пайтда унинг турмуш ўртоғи Салаевга пневматик қурол ишлатилган ҳолда уйда бўлган 3 миллион 668 минг сўмлик товар моддий бойликни босқинчилик йўли билан қўлга киритиб, воқеа жойидан яширинишган», — дейди Тошкент шаҳар прокуратураси бўлим бошлиғи ўринбосари Муроджон Содиқов.
Жиноятчилар ўз ҳаракатларини пухта ўйлаган режа асосида амалга оширишган, аммо улар хонадон атрофига ўрнатилган кузатув камерасини инобатга олмаган эди.
Гуруҳ аъзолари ёш бўлишига қарамай иккинчи маротаба жиноят содир этишмоқда. Илгари ҳам босқинчилик билан қўлга тушиб, жазони ўтаб қайтган Илҳом Иззатуллаевнинг озодликдаги ҳаёти 5 ойгина давом этди. Никоҳ тўйига 3 кун қолганда шерикларининг осон пул топиш таклифи унинг нафсини қитиқлади ва жиноят йўлига бошлаган.
Босқинчилик жиноятини содир этган жиноий гуруҳнинг 5 нафар аъзосига ҳукм ўқилди. Суд ҳукмига кўра Илҳом Иззатуллаевга 11 йил 3 ой муддатга озодликдан маҳрум этиш жазоси тайинланди. Жиноий гуруҳнинг қолган аъзолари ҳам суд ҳукми билан 10 йилдан 12 йилгача озодликдан маҳрум этилди.
Изоҳ (0)