Машҳур қўшиқчи Алла Пугачёванинг жазосини беришни режалаштирган серияли қотил Анатолий Нагиевнинг амалга ошмай қолган жинояти тафсилотлари ОАВлар қўлига келиб тушди, деб ёзади Tengrinews. Маълум бўлишича, у хонандага суиқасд уюштиришни бир йил давомида режалаштирган: Пугачёванинг танишлари доирасини кузатган, унинг гастроллари ҳақида маълумот тўплаган, ҳатто унинг кун тартиби тафсилотларини ўрганган.
Ўз жиноятларини Анатолий Нагиев 70 йиллар охирида амалга оширган. У биринчи марта жинсий зўравонлик сабабли қамоққа тушган. Озодликдан маҳрум этиш муассасаларида унинг дарди-фикри Алла Пугачёвадан иборат бўлган. Доимий равишда унинг қўшиқларини тинглаган, суратларини томоша қилган. Озодликка чиққач, ўйлаган ниятини амалга ошириш учун уни қидириб кетган.
Нагиев мунтазам равишда Пугачёванинг концертларига бориб, у билан шахсий алоқа ўрнатишга уринган. Бир куни унинг гримхонасига савлатли киши кўринишида кириб, ўзини аллақандай «жиддий шахс» деб таништирган ва катта гулдаста совға қилган. Бундан таъсирланган Пугачёва унга уй манзилини берган.
Ҳуқуқ-тартибот органларининг собиқ ходимлари маълум қилган версиялардан бирига кўра, Нагиев Пугачёва яшайдиган уй подезди ёнига келиб, уни кутган. Қўшиқчи подезд ичкарисига кирганида унинг ортидан кирган ва у билан бирга лифтга чиқмоқчи бўлган. Аммо консьерж нотаниш одамни пайқаб, уни чақирган, шунда Нагиев лифтга чиқишга улгурмай қолган. Бундан кўп ўтмай, маняк Москвани тарк этган. У келажакда қайтиб келиб, амалга ошира олмаган ниятини бажаришга яна уриниб кўришни кўнглига тугиб қўйган. Аммо 1981 йил октябрида Нагиев Новочеркасск қамоқхонасида отиб ташланган.
Изоҳ (0)