Расман: «Манчестер Сити» — Англия чемпиони

«Манчестер Сити» 2017/18 йилги мавсумда Англия премьер лигаси чемпионига айланди.

34-турда доирасида кеча, 14 апрель санасида «Манчестер Сити» сафарда «Тоттенҳэм»ни 3:1 ҳисобида мағлуб этган эди. Бугун эса иккинчи ўриндаги Жозе Моуриньо бошлиқ «Манчестер Юнайтед» ўз уйида сўнгги ўриндаги «Вест Бромвич»га 0:1 ҳисобида​ ютқазиб қўйди.

Чемпионат тугашига 5 та тур қолган бир паллада Хосеп Гвардиола жамоаси «Юнайтед»дан 16 очкога олдинлаб кетди ва муддатидан аввал чемпионликни ҳал этди.

Шу тариқа «Манчестер Сити» ўз тарихида бешинчи бор Англия чемпиони деган унвонга сазовор бўлди (1936/37, 1967/68, 2011/12, 2013/14, 2017/18).

Пеп Гвардиола «Сити» билан чемпион бўлгунга қадар, Испанияда «Барселона» билан (3 марта), Германияда эса «Бавария» (3 марта) билан мамлакатда тенгсиз бўлишга эриша олган эди. Шу тариқа Гвардиола 3 та топ-лигада чемпион бўла олди. Ундан аввал бундай натижани Карло Анчелотти ( 4 та лигада — Англия, Италия, Франция, Германия) ҳамда Жозе Моуриньо (3 – Англия, Италия, Испания) қайд эта олганди.

Пеп мураббийлик фаолиятида 23 та совринни қўлга киритишга улгурди. Жозе Моуриньо эса шу кунга қадар 25 та совринга эга чиққан.