Тошкент шаҳри ва Жиззах вилоятида рўй берган йўл-транспорт ҳодисаларида 4 киши ҳалок бўлди, 2 киши яраланди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Тошкент шаҳрининг Бектемир туманида 11 апрель куни соат 23:40 атрофида Сергели туманида яшовчи «Авто Грант» МЧЖ ҳайдовчиси, 1992 йилда туғилган К.Қурбонов ўзига бириктирилган Cobalt русумли машинани Ҳусайн Бойқаро кўчасида ҳайдаб кетаётганда ариққа тушиб, дарахтга урилди.
Ҳодиса оқибатида йўловчилар — 1985 йилда туғилган Н.Абдуллаев ва 1991 йилда туғилган С.Хўжанова олган жароҳатларидан воқеа жойида ҳалок бўлди. Ҳайдовчи К.Қурбонов ва яна бир йўловчи, 1996 йилда туғилган Ш.Тошпўлатова касалхонага ётқизилди.
Жиззах вилоятининг Фориш туманида 13 апрель куни соат 00:10 ларда Эгизбулоқ қишлоғида яшаган, 1993 йилда туғилган К.Ҳасанов Lacetti автомобилини шу ҳудуддаги «Янгиқишлоқ—Банд даҳаси» йўлининг 1-километрида ҳайдаб кетаётиб, йўл четига чиқиб кетиб, ағдарилди.
Ҳайдовчи К.Ҳасанов ва унинг йўловчиси, ҳамқишлоғи, 1993 йилда туғилган А.Очилов воқеа жойида ҳаётдан кўз юмди.
Изоҳ (0)