Гулистон шаҳар Истиқлол маҳалласида 1-сонли «Севинч» нодавлат мактабгача таълим муассасаси фойдаланишга топширилди. Бу ҳақда Мактабгача таълим вазирлиги матбуот хизмати «Дарё»га маълум қилди.
Хабар беришларича, хорижий тилларга ихтисослаштирилган ушбу болалар боғчаси 130 ўринга мўлжалланган бўлиб, унинг қурилишига 1,7 миллиард сўм маблағ сарфланган.
«Мазкур мактабгача таълим муассасасининг олтита гуруҳида инглиз, рус ва корейс тилларида машғулотлар олиб борилади», — дейилади вазирлик ахборотида.
Болалар боғчасида қисқа муддатли гуруҳлардан тортиб 24 соатлик гуруҳларгача бўлган уч сменали фаолият йўлга қўйилган. Ота-оналар бадал тўлови миқдори эса 300 000 сўмдан 1 200 000 сўмгача қилиб белгиланган.
Аввалроқ Ўзбекистон Президентининг матбуот котиби Комил Алламжонов 13 апрель куни Шавкат Мирзиёев Сирдарё вилоятига ташриф буюришини маълум қилган эди. Мактабгача таълим вазирлигидан маълум қилишларича, ташриф давомида Президент «Севинч» нодавлат мактабгача таълим муассасасида ҳам бўлиши кутилмоқда.
Изоҳ (0)