Мудофаа вазирлиги марказий аппаратида 9 апрель куни буюк саркарда Амир Темур таваллудининг 682 йиллиги муносабати билан «Амир Темурнинг ҳарбий юришлари ва жаҳон ҳарбий санъти ривожига қўшган ҳиссаси» мавзусида маънавий-маърифий тадбир билан бошланди. Бу ҳақда «Дарё»га вазирлик матбуот хизмати маълум қилди.
Унда сўзга чиққанлар янги маълумотлар, дунёнинг машҳур тарихчилари фикр-мулоҳазалари билан бойитилган маърузаларда Темур томонидан яратилган ҳарб илми ва санъатининг энг ноёб усуллари ҳали ҳам ўз қадр-қимматини йўқотмаганини таъкидлади.
Тадбирда Ўзбекистон миллий университети тарих факультети, Ўзбекистон тарихи кафедраси доценти, тарих фанлари номзоди Неъматжон Полвонов ва бошқалар маърузалар билан қатнашди.
Шунингдек, пойтахтдаги Амир Темур хиёбонида саркарданинг таваллуди муносабати ўтказилган маънавий-маърифий тадбирда Мудофаа вазирлиги олий ҳарбий таълим муассасалари офицер ва курсантлари иштирок этиб,Соҳибқирон ҳайкали пойига гулдасталар қўйди.
Шу куни вазирлик тизимидаги ҳарбий қисм ва муассасаларда турли учрашув, кўрик-танлов ҳамда илмий конференциялар ташкил этилди. Жумладан, Марказий ҳарбий округида жойлашган ҳарбий қисм ҳарбий хизматчилари ўртасида санага бағишлаб интелектуал беллашув ва спорт мусобақаси бўлиб ўтди. Беллашувда Миллий гвардиянинг «Темурбеклар», Ҳаво ҳужумидан мудофаа қўшинлари ва Ҳарбий ҳаво кучларининг «Само лочинлари», Самарқанддаги Қуролли кучлар кичик мутахассисларни тайёрлаш марказининг «Арслонлар» ҳамда ҳарбий округнинг «Амир Темур ворислари» жамоалари баҳслашди. Жамоа иштирокчилари нафақат Соҳибқирон шахсиятини, балки унинг кучли ҳарбий салоҳиятини саҳна кўринишлари орқали намойиш этди. Спортнинг арқон тортиш, тош кўтариш, 3 минг метрга югуриш, тортиниш каби турлари бўйича куч синашди. Мусобақа ғолиб ва совриндорлари округ қўшинлари қўмондонлиги ҳамда Ўзбекистон ёшлар иттифоқи томонидан фахрий ёрлиқ ва китоблар билан тақдирланди.
Жануби-ғарбий махсус, Шимоли-ғарбий, Тошкент ҳамда Шарқий ҳарбий округларда ҳам Амир Темур таваллуд куни кўтаринки руҳда қарши олинди.
Изоҳ (0)