Мутахассислар WhatsApp мессенжеридаги гуруҳ чатларида сақланган шахсий маълумотлар хавф остидалигини аниқлади, негаки ҳар қандай фойдаланувчи бу маълумотларни, шунингдек, гуруҳда келтирилган телефон рақамларини, сурат ва видеоларни тўплаб, сақлаб қўйиши мумкин. Бу ҳақда Venture Beat хабар бермоқда.
Тадқиқотни Лозаннадаги Федерал политехника мактаби вакили Киран Гаримелла ҳамда Лондондаги қиролича Мария университети тадқиқотчиси Гарет Тайсон ўтказди. Мутахассислар ярим йил давомида 178 гуруҳ чати ҳақида маълумот тўплаб борди. Бу чатлар веб-қидирув ёрдамида аниқланди.
Жами 46 минг фойдаланувчи юборган ярим миллион хабар таҳлилдан ўтказилди.
Тадқиқотчилар WhatsApp ўрнатилган смартфон ёрдамида ҳиндистонлик олимлар таклиф этган методика бўйича иш олиб борди. Чатлардан олинган барча маълумот ускунадаги локал базада сақланади. Улар бу массивни чиқариб олишга эришди.
Тадқиқотда таъкидланишича, ахборотни фақат чатга киргандан сўнг олиш мумкин бўлади, олдинроқ юборилган хабарларни эса кўриб бўлмайди.
Изоҳ (0)