Япониялик режиссёр Киёши Куросава навбатдаги фильмини Ўзбекистонда суратга олади, дея хабар бермоқда The Hollywood Reporter. Тасвирга олиш ишлари майда бошланади.
Ишчи номи «Дунёнинг нариги бурчагига» (To the Ends of the Earth) бўлган сценарий Куросаванинг қаламига мансуб бўлиб, япониялик телебошловчи аёлнинг кўрсатув суратга олиш учун Ўзбекистонга қилган сафари ҳақида ҳикоя қилади. Унинг Ўзбекистонда бошидан кечирганлари одатда эҳтиёткор ва интроспектив (ўз-ўзини таҳлил қилаверадиган) аёлни ўзгартиради.
Япония ва Ўзбекистоннинг кино соҳасидаги ушбу ҳамкорлиги икки мамлакат дипломатик алоқаларининг 25 йиллиги ҳамда Иккинчи жаҳон урушидан кейин япон аскарлари ёрдами билан қайта қурилган Тошкентдаги Навоий театрининг 70 йиллигига бағишланади.
«Бир замонлар буюк бўлган Темирийлар империяси мени ўнлаб йиллар давомида ҳайратга солиб келган. Бугун Ўзбекистон халқи дунёнинг айнан ўша қисмида яшайди. Ҳозир эса мен ўзим жуда ҳурмат қиладиган ижодий гуруҳ билан биргаликда Буюк ипак йўлида фильм тасвирга олмоқчиман. ‘Дунёнинг нариги бурчагига’ шубҳасиз менинг ҳеч бир фильмимга ўхшамайди. Бу бир вақтнинг ўзида бир нечта орзуларнинг амалга ошишидир», — деди Куросава лойиҳа ҳақида.
Таниқли япон режиссёри Киёши Куросава 2017 йил октябрида Ўзбекистонга ташриф буюргани, кўплаб халқаро совринларга сазовор бўлган фильмлар муаллифи Ўзбекистонда навбатдаги фильмини суратга олиш ниятида эканлиги маълум бўлган эди.