Ўзбекистонда илк бор телемаҳсулот ишлаб чиқарувчилар, реклама берувчилар ва медиа бозорнинг бошқа иштирокчиларини бирлаштирувчи лойиҳа ишга туширилди

Ўзбекистон Миллий телерадиокомпанияси медиа марказида илк бор Media content-market МТРК-2018 лойиҳаси тақдимоти бўлиб ўтди. Унда замонавий телевидение имкониятлари намойиш этилди, дея хабар беради ЎзА.

Тақдимотда телерадиокомпания ходимлари, республика ОАВ вакиллари, хорижий ҳамкорлар иштирок этди.

Қайд этилганидек, Ўзбекистонда илк бор телевизион маҳсулот ишлаб чиқарувчилар, реклама берувчилар ва медиа бозорнинг бошқа иштирокчиларини бирлаштирувчи кенг кўламли лойиҳа ишга туширилмоқда. Лойиҳадан кўзланган асосий мақсад ОАВнинг ўзаро ҳамкорлиги учун самарали майдон яратиш ва миллий телевидениени ривожлантиришдан иборат.

Тақдимотда Ўзбекистон Миллий телерадиокомпанияси раиси Алишер Хўжаев телеканалларда намойиш этиладиган информацион дастурлар, телелойиҳалар, барча турдаги медиа-маҳсулотларни томошабинга замонавий форматда, сифатли тарзда етказиб бериш эндиликда янги босқичга кўтарилганини таъкидлаб ўтди.

Тақдимот жараёнида бўлажак мавсумда томошабинларга тақдим этиладиган миллий ва хорижий сериалларнинг қисқача анонси намойиш этилди. Унга кўра, 2018 йилда телеканаллар орқали «Меҳмонхона – 2», «Зурриёт-2», «Ўгай она», «Тугун», «Саодат-2» каби миллий сериаллар намойиш этилади.

Шунингдек, турли кўнгилочар шоу дастурлар, спорт воқеалари трансляцияси каби янги телевизион маҳсулотларининг видео тақдимоти бўлиб ўтди. ТВ-каналлар ва реклама берувчиларнинг яқин ҳамкорлиги асосида янги, йирик ва қизиқарли премера ва анонслар илк бора мазкур форум доирасида трансляция қилинади.