UZ24 Тошкент шаҳридаги йирик савдо кўнгилочар марказлари билан боғланиб, ёнғин хавфсизлиги бўйича ишлаб чиқилган чоралар ҳамда Кемерово фожиасидан сўнг қўшимча равишда ўтказилаётган тадбирлар тўғрисида маълумот олди.
— Савдо-кўнгилочар марказимизда ёнғин хавфсизлигига амал қилиш, фавқулодда вазиятлар юзага келган ҳолатларда қандай йўл тутиш борасида режали чора-тадбирлар ишлаб чиқилган, — дейди Samarqand Darvoza муассасасининг ёнғин хавфсизлиги ва техник хавфсизлик бўйича муҳандиси Азиз Тўраев. — Масканда бу каби ҳолатлар юзага келганда зудлик билан сигнализация тизими ишга тушади ва бу тизим доимий назоратда. Шунингдек, бино бўйлаб фуқароларни огоҳлантирувчи махсус товушли мосламалар ўрнатилган. Ҳар бир қават ёнғин ўчириш анжомлари билан таъминланган.
Унинг таъкидлашича, савдо-кўнгилочар марказида 15 кишидан иборат кўнгилли ёнғин ўчириш гуруҳи ташкил этилган бўлиб, улар ноҳуш ҳолатлар юзага келган вақтда дарҳол ёнғинни бартараф этиш, фуқароларни режали асосда бинодан эвакуация қилиш сингари вазифаларга масъул. Ушбу гуруҳ аъзолари ҳар олти ой давомида қайта ўқиб, ўз малакаларини ошириб боради, турли амалий машғулотлар ўтказади.
«Кемеровода юз берган фожиадан сўнг, мажмуадаги ёнғин хавфсизлиги чоралари янада кучайтирилди, ўтган икки кун давомида назорат тадбирлари ташкил этиб, бинони тўлиқ кўздан кечириб чиқмоқдамиз», дея қўшимча қилади А. Тўраев.
Mega Planet савдо-кўнгилочар маркази директори ўринбосари Аҳмадхон Сайфуллаевнинг маълум қилишича, марказ маъмурияти томонидан бинода ёнғинга қарши ҳимоя тизими ва ёнғинни ўчириш воситалари ҳолати қайта текшириб чиқилган. Ходимлар ўртасида тушунтириш ишлари олиб борилиб, фавқулодда юз берадиган ҳолларда қандай харакатланишлари, ҳар бир иштирокчининг вазифалари қай даражада бўлиши лозимлиги яна бир бор қайта ўрганиб чиқилди, уларнинг ҳар бирининг фаолият юритаётган ҳудудига жавобгарлиги кучайтирилди.
«Бизда ҳимоя тизими қаттиқ назорат қилинади. Ёнғин хавфсизлиги талабларининг бузилишига йўл қўйилмайди. Ёнғин ва турли фавқулодда вазиятларнинг олдини олиш мақсадида бино ертўласида жойлашган автотураргоҳга газ баллон ўрнатилган автомобиллар кириши тақиқланган. Ташриф буюрувчиларнинг кириши доимий текширилиб, портловчи, кесувчи, заҳарловчи моддалар олиб кирилишига рухсат этилмайди», деди А.Сайфуллаев
Муассасалар вакилларига кўра, савдо-кўнгилочар марказларининг барча ходимлари ёнғин ва фавқулодда ҳолатларда қандай йўл тутиш зарурлиги борасида махсус йўриқномалар билан таништирилган.
UZ24 Next савдо-кўнгилочар мажмуасига мурожаат этганида мажмуа ходими раҳбарият рухсатисиз саволларга жавоб беролмаслигини билдирган.
Эслатиб ўтамиз, олдинроқ Кемероводаги фожиадан сўнг Тошкентдаги барча савдо марказлари ёнғин хавфсизлигига ёппасига текширувдан ўтказилиши маълум қилинганди.
Изоҳ (0)