Олий ҳарбий таълим муассасаларига ёшларни саралаш бўйича қабул комиссияси ташкил этилди

Ўзбекистон мудофаа вазирининг буйруғи билан 2018 йилда олий ҳарбий таълим муассасаларига ўқишга кириш истагида бўлган ёшларни саралаш бўйича қабул комиссияси ташкил этилди. Бу ҳақда вазирлик матбуот хизмати хабар бермоқда.

Олий ҳарбий таълим муассасаларига тингловчиларни саралаш қуйидаги тартибда амалга оширилади:

• Ҳарбий-профессионал йўналиш;
• Дастлабки танлаш;
• Ҳарбий-профессионал танлаш;
• Тест синовларини назарда тутувчи комплекс босқичма-босқич танлаш.

Дастлаб кичик комиссия таркиби томонидан номзодларнинг индивидуал-психологик сифатлари ўрганилиб, уларнинг жисмоний тайёргарлиги синовдан ўтказилади. Саралаш ишлари вилоятлардаги мудофаа ишлари бошқармаларида 1 апрелдан 20 майга қадар ўтказилади. Номзодларнинг ҳужжатлари ўрганилиб, жадвалга мувофиқ якуний тиббий гувоҳлантириш, компьютер техникаси ва ахборот-коммуникация технологиялари бўйича билими, ёзма иши (диктант) текширилади.

2018 йилда номзодлар мудофаа вазирлигининг қуйидаги олий ҳарбий таълим муассасаларига ўқишга қабул қилинади:

1. Ўзбекистон Республикаси Қуролли Кучлари академияси умумқўшин факультети;
2. Чирчиқ олий танк қўмондонлик-муҳандислик билим юрти;
3. Жиззах олий ҳарбий авиация билим юрти;
4. Ал-Хоразмий номидаги Тошкент ахборот технологиялари университети махсус факультети;
5. Тошкент тиббиёт академияси ҳузуридаги ҳарбий тиббиёт факультети.

«Олий ҳарбий таълим муассасаларига қабул қилиш танлов, тенг ҳуқуқлилик ва қабул қилишнинг ягона қоидалари асосида амалга оширилади», — дейилади хабарда.

Номзодлар уч тилдан — ўзбек, қорақалпоқ ва рус тилларидан бирини шахсан танлаган ҳолда тест синовлари топширади.