Термизда Сурхондарё ва Балх вилоятлари товар ишлаб чиқарувчиларининг кўргазма-ярмаркаси бўлиб ўтди

Термиздаги «Termiz kargo» экспорт марказида Сурхондарё ва Афғонистоннинг Балх вилоятлари товар ишлаб чиқарувчиларининг кўргазма-ярмаркаси ўтказилди. Бу ҳақда ЎзА хабар бермоқда.

Сурхондарёлик тадбиркорлар Балх вилоятига қурилиш материаллари, озиқ-овқат маҳсулотлари, халқ истеъмоли товарларини экспорт қилмоқда. Бундай ишбилармонлар сафи тобора кенгайиб бормоқда.

Жорий йилдан бошлаб Термиз шаҳридаги «Альп Умид Файз» масъулияти чекланган жамияти ёдланган туз, Жарқўрғон туманидаги «Жарқўрғон парранда» масъулияти чекланган жамияти тухум, «Сурхон саноат қурилиш инвест» қурилиш-ишлаб чиқариш корхоналари бирлашмаси қамиш заррачали плиталарни экспорт қилишни йўлга қўйди. Натижада бу йил Сурхондарё вилоятидан Афғонистонга жўнатилган маҳсулотлар ҳажми ўтган йилнинг шу даврига нисбатан бир неча баробар ўсди.

Кўргазма-ярмаркада Сурхондарё вилоятидаги 80 дан ортиқ тадбиркорлик субекти ўзлари ишлаб чиқараётган озиқ-овқат, енгил саноат, чарм-пояфзал, қурилиш материллари ва бошқа тайёр маҳсулотлар билан иштирок этди.

— Корхонамизда ишлаб чиқарилаётган чинни буюмларга афғон дўстларимиз катта қизиқиш билдирмоқда, – дейди «Сурхон Термиз чинни» масъулияти чекланган жамияти раҳбари Р.Неъматуллаев.

— Икки ойда 60 минг доллар қийматидаги маҳсулот экспорт қилдик. Бугун балхлик бир гуруҳ тадбиркорлар сифатли, арзон буюмларимиз билан танишиб, ўзаро манфаатли савдо алоқаларини йўлга қўйиш истагини билдирди.

Тадбир доирасида бизнес-форум ташкил этилиб, «Сурхондарё вилоятининг экспорт ва инвестициявий салоҳияти», «Сурхондарё ва Балх вилоятлари тадбиркорлари ўртасида ўзаро манфаатли ҳамкорликни ривожлантиришнинг муҳим масалалари» каби мавзуларда тақдимотлар ўтказилди. Кооперацион биржа ташкил этилди. Сурхондарёлик товар ишлаб чиқарувчилар ва балхлик ишбилармонлар ўртасида 5,5 миллион долларлик шартномалар имзоланди.

— Замонавий хориж ускуналари билан жиҳозланган корхонамизда 70 турдаги музқаймоқ, сут ва сут маҳсулотлари ишлаб чиқарилмоқда, — дейди Термиз шаҳридаги «Саиджон Муҳаммаджон музқаймоқлари» масъулияти чекланган жамияти раҳбари Ў.Сатторов.

— Бугун Балх вилоятидаги «Покиза ширкати» фирмасига 400 минг доллар қийматидаги музқаймоқ ва қуритилган сут етказиб бериш юзасидан шартнома имзоладик. Ён қўшнимиз буюртмасини белгиланган муддатда сифатли амалга ошириш учун барча имкониятдан унумли фойдаланамиз.

Тадбир доирасида Балх тадбиркорлари Сурхондарё вилоятидаги қатор экспортчи корхоналар фаолияти билан танишди.