Хизмат автомобилини пиёдалар ўтиш жойига тўхтатиб, йўл ҳаракати қоидасини бузган патруль-пост хизмати бригадаси ходими жазоланди. Бу ҳақда Тошкент шаҳар Ички ишлар бош бошқармаси расмий сайти хабар бермоқда.
Пиёдалар ўтиш жойида тўхтаб турган Nexia русумли патруль автомобили фотосуратини ижтимоий тармоқ фойдаланувчилари эълон қилган.
Ушбу хабар юзасидан текширув ишлари олиб борилди. Йўл ҳаракати қоидасини бузган патруль-пост хизмати бригадаси ходими ҳайдовчи 1987 йилда туғилган С.К.га нисбатан Ўзбекистон Республикаси Маъмурий жавобгарлик тўғрисидаги Кодекснинг 1286-1 моддаси (Транспорт воситалари ҳайдовчиларининг тўхташ ёки тўхтаб туриш қоидаларини бузиши)га асосан маъмурий баённома расмийлаштирилиб, энг кам иш ҳақининг 3 баробари миқдорида (бугунги кунда — беш юз ўн олти минг етти юз йигирма сўм) жарима тайинланди.
«Содир этилган ёки содир этилиши мумкин бўлган ҳуқуқбузарликларнинг олдини олиш бўйича ички ишлар идоралари ходимлари томонидан тегишли чоралар кўрилмаган тақдирда, ходимлар томонидан қонунчилик, хизмат интизомининг бузилиши ҳолатлари аниқланганда, амалдаги қонунчиликда белгиланган жазо чоралари кўрилади. Шунингдек, ҳар бир ички ишлар идоралари ходими содир этган хатти-ҳаракати учун фуқаролар билан тенг ҳуқуқлилик асосида маъмурий ва жиноий жавобгарликка тортилиб бу ҳақда ижтимоий тармоқ ва оммавий ахборот воситалари орқали ёритиб борилишини маълум қиламиз», — дейилади хабарда.
ИИББ фуқароларга фаоллиги учун миннатдорлик билдириб қолди. «Ҳуқуқбузарликларни содир этган шахслар тўғрисида берган хабарингизга асосан қонуний чоралар кўрилади», — дейилади хабарда. Шунингдек, қонун олдида ҳамма баробарлиги таъкидланган.
Изоҳ (0)