Суперлига. 1-турга 80 мингдан зиёд ишқибоз келганди. 3-турга келибоқ бу кўрсаткич янгиланди

Ўзбекистон Суперлигасининг 3-тури мухлислар ташрифи борасида энг яхшиси бўлди. Мазкур турдан жой олган 6 та учрашувни жами 85 209 нафар мухлис кузатиб борди, деб хабар бермоқда ЎФА.

Мавсумдаги илк турни кўриш учун стадионларга 80 570 ишқибоз ташриф буюрганди. Бунда энг кўп ишқибоз «Нефтчи» — «Насаф» ўйинига келди — 19 632.

2-турда эса ташрифлар сони камайган — 57 876. Бироқ 1 та ўйин борасидаги кўрсаткич яхшиланди ҳамда «Бунёдкор» ва «Пахтакор» клублари ўртасидаги Тошкент дербисини 20 168 мухлис стадиондан кузатди. Бу кўрсаткич мазкур икки клубнинг ўзаро ўйинлардаги рекорд натижаси бўлди. Бунгача 2008 йилги мавсумдаги Тошкент дербисини 18 мингдан кўпроқ ишқибоз кузатиб борганди.

3-турга келиб Суперлиганинг рекорди Наманганда янгиланди. «Навбаҳор» ҳамда «Локомотив» жамоалари иштирокидаги ўйинни 25 300 ишқибоз стадиондан кузатди. Шу куни айрим секторларга чипталар 30 мингдан сотилган бўлса-да, стадион кассаларида бирорта ҳам чипта қолмади. Шунингдек, Намангандаги стадионга кириш истагида бўлган яна минглаб мухлислар трибуналардан жой топа олмай, «Навбаҳор»ни майдон ташқарисида қўллаб турди.

Натижада 3-турда умумий кўрсаткич янада яхшиланди. Ундан жой олган 6 та учрашувни кўриш учун жами 85 209 ишқибоз стадионга келди.

• «Металлург» – «Қўқон-1912» — 5 641
• «Бухоро» - «Сўғдиёна» — 14 800
• «Нефтчи – «Бунёдкор» — 18 051
• «Навбаҳор» – «Локомотив» — 25 300
• «Пахтакор» – АГМК — 12 852
• «Қизилқум» – «Насаф» — 8 565