Лондондаги Британия музейида Мирзо Улуғбекнинг пиёласи сақланмоқда (фото)

Лондондаги Британия музейида Ўзбекистон тарихига оид ўта ноёб экспонат — Мирзо Улуғбек сув ичган пиёла сақланади. Бу ҳақда «Халқ сўзи» хабар берди.

Узунлиги 15 сантиметр бўлган пиёла юзига «Улуғбек Кўрагон» деб ёзилган. Пиёла яшил рангли нефрит тошдан ўта моҳирлик билан сайқалланган ҳолда ишланган.

Унинг банди аждар шаклида бўлиб, оғзи пиёла учини тишлаган, оёқлари ерга тегиб туради. Пиёланинг оғиз тегар ери лаб шаклида бўлиб, унга «Карами Ҳаққа ниҳоят йўқдур» деган ёзув битилган.

Ўша вақтлар нефрит Мовароуннаҳрда ноёб тош саналган. Пиёланинг нефритдан ишланишининг сабаби, у чақмоқ уришидан сақлаган. Энг асосийси, нефритга солинган заҳар ўз таъсир кучини йўқотган.

Британия музейи Мирзо Улуғбек фойдаланган нодир пиёланинг нусхасини Ўзбекистон буюртмаси бўйича тайёрлаб беришга тайёр эканини маълум қилди.

Яқинда Лондонда қатор учрашув ҳамда музокаралар ўтказган Ўзбекистон делегацияси Британия музейига ташриф буюрди. Делегацияни Британия музейи директори Ҳартвиг Фишер қабул қилди.

Учрашувда томонлар ўзаро ҳамкорликни янада ривожлантиришдан манфаатдор эканликларини изҳор этдилар. Музокаралар натижасида Британия музейи ходимларининг Ўзбекистонга сафарини ташкил этиш, ўзаро тажриба алмашишни йўлга қўйиш, музей фондида сақланаётган мамлакат тарихига оид нодир экспонатларни тадқиқ қилиш, каталогларини яратиш, ўзбекистонлик мутахассисларнинг Британия музейида амалиёт ўташларини жорий этиш бўйича дастлабки келишувларга эришилди.

Музей мутахассислари Ўзбекистон тарихига оид экспонатларнинг ёзув-шарҳларини ўзбекистонлик олимлар билан биргаликда тайёрлайдиган бўлди. Шунингдек, Ўзбекистоннинг Буюк Британиядаги элчихонасида музей олимларининг ўзбекистонлик ҳамкасблари учун онлайн маърузаларини йўлга қўйиш масаласи муҳокама этилди.