АҚШнинг Миссури штати Клинтон округида 30 ёшли полиция офицери Кристофер Райан Мортон 911 қўнғироқларини қабул қилиш дастури ишидаги носозлик туфайли нотўғри манзил бўйича борди ва отиб ўлдирилди, деб ёзади Forum Daily.
911 хизматига Клинтондаги уйлардан бирида икки аёл жанжаллашаётгани ҳақида қўнғироқ бўлган, у ерга патрулда бўлган уч полициячи йўл олган. Аммо қўнғироқ аслида Клинтондан 15 км масофадаги Виндзор округидан келиб тушгани кейинроқ маълум бўлган. Манзилдаги хатолик 911 чақирув технологиясидаги носозлик туфайли келиб чиққани тахмин этилмоқда.
Мортон етиб келган уйда ҳеч қандай жанжал кузатилмаган, аммо қоида бўйича патруль ходимлари уйга кириб вазият хавфсиз эканлигига ишонч ҳосил қилиши керак бўлган. Уй ичидаги 37 ёшли эркак полициячиларни ўққа тутган, Мортон ҳалок бўлган, қолган икки ҳамкасби яраланган.
Уйда яшовчи эркак жинсий зўравонлик ҳақидаги иш бўйича қидирувда бўлгани, унинг хотини эса метамфетамин сақлаш ва тарқатиш ҳақидаги ишга алоқадор бўлгани аниқланган.
Изоҳ (0)