Президент фармони билан спортни ривожлантириш йўлида Ўзбекистонда 5 та янги марказ иш бошлайди
Ўзбекистон Президенти Шавкат Мирзиёев жисмоний тарбия ва спортнинг давлат томонидан бошқаруви тизимини ривожлантиришга доир фармонга имзо чекканди.
Ўзбекистон спорти тубдан ўзгаради. Президент ўз фармонида спорт ривожига тўсқинлик қилаётган 9 та тизимли муаммони санаб ўтди
Мазкур фармон спорт соҳасидаги бир қатор ўзгаришларни қамраб олган бўлиб, бошқарувни яхлит тизимга келтириш учун 5 та марказ иш бошлаши алоҳида кўрсатиб ўтилган.Мониторинг бошқармаси
Фармоннинг кириш қисмида спорт соҳасининг ривожланишига тўсқинлик қилаётган жиҳатлар санаб ўтилганди. Улардан бири спорт учун ажратилаётган маблағдан оқилона фойдалана олмасликдир.Шундан келиб чиқиб, Шавкат Мирзиёев Жисмония тарбия ва спорт соҳасида мониторинг бошқармасини ташкил этиш фармонини берган. Бошқарма Спорт вазирлигининг марказий аппарати тузилмасида вужудга келади. У давлатнинг спортга ажратаётган маблағлари қай тариқа сарф этилаётганини таҳлил қилади, одамлар спорт хизматларидан фойдаланишдан қониқяптими ёки йўқ, фойдаланишда уларнинг шароитлари қандай экани каби масалаларни ўрганади. Коррупция ва бошқа суиистеъмолчилик ҳолатларини аниқлайди.
Спортни ривожлантириш жамғармаси
Спорт вазирлиги ҳудудида, шунингдек, Жисмоний тарбия ва спортни ривожлантириш жамғармаси иш бошлайди. Унинг 14 та ҳудудий бўлинмаси бўлади (Қорақалпоғистон, 12 та вилоят ва Тошкент шаҳрида). Мазкур фаолият Болалар спортини ривожлантириш жамғармасининг негизида вужудга келади.Мутахассислар тайёрлаш маркази
Фармоннинг кириш қисмида спортнинг ривожланиши учун малакали мутахассисларнинг етишмовчилиги асосий омиллардан бири экани эътироф этилганди. Шундан келиб чиқиб, Жисмоний тарбия ва спорт бўйича мутахассисларни илмий-методик таъминлаш, қайта тайёрлаш ва малакасини ошириш маркази ташкил этилади.Бундай марказ шу вақтга қадар ЎзДЖТИ қошида фаолият кўрсатиб келган бўлса, энди у Спорт вазирлиги тасарруфига ўтказилади. Марказ Кўкча дарвоза кўчасидаги 27-уйни манзил қилиб олади. Унинг Нукус, Самарқанд ва Фарғона шаҳарларида филиаллари бўлади.
Жисмоний тарбия ва спорт универститети
Бунгача Ўзбекистон давлат жисмоний тарбия институти фаолият кўрсатиб келган бўлса, энди унинг негизида Ўзбекистон давлат жисмоний тарбия ва спорт университети ташкил топади.«Спорт» эркин иқтисодий зонаси
Спорт соҳасидаги муаммолар орасида Ўзбекистонда халқаро стандартларга жавоб бера оладиган спорт асбоб-ускуналари ва инвентарларини ишлаб чиқариш йўлга қўйилмагани, чунки шу турдаги ишлаб чиқаришни қўллаб-қувватлайдиган механизмнинг ўзи йўқлиги айтилганди.Энди эса жаҳоннинг етакчи спорт фирмаларини жалб қилган ҳолда, спорт кийимлари, анжомлари, жиҳозларини ишлаб чиқарувчи замонавий корхоналар фаолиятини ташкил этиш учун Тошкентда «Спорт» эркин иқтисодий зонаси ташкил қилинади.
