6 мартнинг эътиборга молик янгиликлари — «Дарё»нинг кечки дайжестида.
1. Президент Шавкат Мирзиёев муҳим қарорни имзолади: Ўзбекистондан хорижга кетаётган меҳнат муҳожирларига 1000 долларгача кредит берилади. Хорижга ишлагани кетаётган ўзбекистонликларга темирйўл- ва авиачипталар чегирма билан сотилади. Чиптанинг 300 минг сўмини давлат қоплаб беради. Россия ва Қозоғистонга темирйўл қатновлари кўпайтирилади.
2. Ўзбекистон Президенти матбуот хизмати: Шавкат Мирзиёев 9—10 март кунлари Тожикистонда бўлади. Ташриф арафасида Душанбе ва Самарқанд шаҳарларига Алишер Навоий ҳамда Абдураҳмон Жомийнинг ҳайкаллари ўрнатилиши ҳақида хабарлар пайдо бўлди.
3. Сурияда Россиянинг Ан-26 самолёти қулаши оқибатида 30 дан ортиқ одам ҳалок бўлди. Фожиага техник носозлик сабаб бўлгани тахмин қилинмоқда.
4. Қозоғистондаги ЙТҲда икки ўзбекистонлик ҳалок бўлди. Ҳалок бўлганларнинг ҳар иккиси Андижон вилоятидан. Бири 40, иккинчиси эса 43 ёшда.
5. Тўрт ёшли қизини калтаклаб, буни видеога олган ота озодликдан маҳрум этилди. «Судланувчи сўнгги сўзида қилмишидан қаттиқ пушаймон эканини, аслида фарзандларини яхши кўриши, ўша видеони икки йил давомида хорижда ишлаётган турмуш ўртоғини қайтариш мақсадида тасвирга туширганини айтди».
6. Ўзбекистон спорти тубдан ўзгаради. Шавкат Мирзиёев ўз фармонида спорт ривожига тўсқинлик қилаётган 9 та тизимли муаммони санаб ўтди. Масалан, Ўзбекистонда халқаро стандартларга жавоб бера оладиган спорт асбоб-ускуналари ва инвентарларини ишлаб чиқариш йўлга қўйилмаган.
7. Шавкат Мирзиёев 8 март муносабати билан жиззахлик фермер аёлга Nexia 3 совға қилди. Ташқи ишлар вазири Абдулазиз Комилов эса хорижий давлатларнинг Ўзбекистондаги аёл элчиларини байрам билан табриклади.
8. Лола Каримова-Тиллаева Ўзбекистон гимнастика федерацияси президенти лавозимини тарк этаётганини маълум қилди. «Мен 13 йиллик фаолиятимдан сўнг Ўзбекистон гимнастика федерацияси президентлиги лавозимини тарк этишга мажбур эканлигимни эълон қилмоқчиман».
Изоҳ (0)