Қизилтепа туманидаги аҳоли хонадонларида электр энергиясидан қандай фойланилаётгани ўрганилганда тармоққа ноқонуний уланган, яъни ҳисоблагич ўрнатмасдан электр энергиясидан фойдаланаётган хонадон аниқланган ва уй эгасига нисбатан баённома расмийлаштирилганди. Бу ҳақда ЎзА хабар берди.
Бу воқеадан кейин уй эгаси айбини бўйнига олиб, тегишли жаримани тўлаб, ҳисоблагич ўрнатдими? Афсуски, йўқ. У кўпчиликка таниш бўлган «услуб»дан фойдаланишга ҳаракат қилди. Бироқ, пора таклифи рад этилди.
Жиноят ишлари бўйича Навоий вилояти, Қизилтепа туман судида Мажбурий ижро бюроси туман бўлими катта инспектори А.Хўжақуловга пора беришга уринган шахсларга нисбатан жиноят иши кўриб чиқилди.
— Жиноят кодексининг 211-моддаси 1-қисми билан айбланган ака-ука Жалоловлар жиноий тил бириктириб, давлат органи мансабдор шахсига ўз хизмат мавқеидан фойдаланган ҳолда содир этиши лозим бўлган муайян ҳаракатни уларнинг манфаатларини кўзлаб бажартирмасликка ҳаракат қилган, — дейди жиноят ишлари бўйича Навоий вилояти суди судьяси Дилмурод Отамуродов. — Ноқонуний ҳолат бўйича далолатнома расмийлаштирмаслик эвазига қонунга хилоф эканлигини била туриб 500 минг сўм пул таклиф қилишган.
Судланувчиларга жазо тайинлашда барча ҳолатлар ҳисобга олинди. Уларнинг аввал судланмагани, қарамоғида вояга етмаган фарзандлари борлиги, қилмишларидан чин кўнгилдан пушаймонлиги инобатга олинди ва бир йил муддатга озодликни чеклаш жазоси тайинланди.
Изоҳ (0)