Андижон вилояти, Андижон тумани «Дўстлик» маҳалласида яшовчи Адҳамжон Ваҳобжонов туман истеъмолчилар ҳуқуқларини ҳимоя қилиш жамиятига электр таъминоти корхонаси томонидан 18746650 сўм нореал қарздорлик ҳисобланганидан норози бўлиб, мурожаат қилди. Бу ҳақда ЎзА хабар бермоқда.
Аризада кўрсатилган ҳолат бўйича ўрганиш ишлари олиб борилди. Абонент картаси ҳаракат жадвалига солиштирилганда ҳисоблагич кўрсатгичи бўйича 2015 йил 5 июндан 2018 йил 12 февралга қадар 20623 кВт электр энергия сарфланган ва бу давр учун жами 4299134 сўм тўланган (аслида 3771019 сўм тўланиши керак бўлган). Ўрганиш натижасида аризачи 567020 сўм ҳақдор экани аниқланди.
Ҳисобланган нореал қарздорлик қаердан келиб чиққанини аниқлаш мақсадида федерациянинг туман жамияти Андижон электр корхонасига борди. Аниқланишича, туман электр корхонаси назоратчиси 2017 йил 8 март куни кўрсатгични киритишда хатоликка йўл қўйган ва натижада Адҳамжон Ваҳобжоновга ортиқча қарздорлик ҳисобланган.
Жамият аралашуви билан фуқарога қўйилган нореал қарздорлик олиб ташланди ва унинг ортиқча тўлаган маблағи келгусида фойдаланиладиган электр энергияси учун ҳисобланадиган бўлди.