Тошкентнинг Бунёдкор ва Чўпонота кўчалари кесишмасида қурилаётган, умумий узунлиги 667,5 метр бўлган йўл ўтказгич 2018 йил май ойида фойдаланишга топширилади. Бу ҳақда «Ўзбекистон темир йўллари» компанияси ахборот хизмати хабар бермоқда.
Бунёдкор шоҳ кўчаси Тошкент шаҳрининг энг узун, жанубий ва шимолий қисмларини боғлайди. Мазкур йўналишда доим автомобиллар қатнови тирбанд. Magisтралда жами 9 та йўл ўтказгич мавжуд бўлиб, май ойида уларнинг сони яна биттага кўпаяди.
«Боштранслойиҳа» мутахассислари томонидан ишлаб чиқилган режага кўра, бунёд этилаётган иншоот 6 та йўлакдан иборат. Замонавий йўл ўтказгич эстакада қисмининг узунлиги 488,5 метр бўлиб, баландлиги 8, кенглиги эса 24,5 метрни ташкил этади.
Йирик иншоот жами 23 та устун оралиғида барпо этилади. Умумий узунлиги 124 метр бўлган иккита пиёдалар ўтиш кўприги қурилади. Янги бунёд этилаётган йўл ўтказгичнинг ёритиш тизими ҳам жаҳон андозаларига мос равишда барпо этилади.
Ҳозирги кунда 10 та таянч устунининг пойдевор ишлари тугатилди. Айни пайтда устки каркас ўрнатиш жараёнлари амалга оширилмоқда. Шу кунга қадар бу ерда 2 625 куб метр тупроқ, 12 070 куб метр бетон ишлари бажарилди. Қурилишга 30 дан ортиқ техника, 250 нафарга яқин муҳандис ва ишчи жалб этилган.
Қўшимча қилишларича, жорий йилда «Кўприкқурилиш» трести унитар корхонаси томонидан 7 та кўприк ва йўл ўтказгич қуриш режалаштирилган. Дастлабки бунёдкорлик ишлари бошлаб юборилган.
Изоҳ (0)