Муҳаммад пайғамбар (с.а.в.) бекинган ғор Савр деб аталади. Уч кун давомида Оллоҳнинг элчиси (с.а.в.) Абу Бакр (розияллоҳу анҳу) билан биргаликда ушбу ғорда маккалик бутпарастлардан яширинган, деб ёзади «Islam-Today.ru».
Савр тоғи Маккадан 5 км жануброқда жойлашган. Тоғда катта-кичик ғорлар кўп. Муҳаммад пайғамбар (с.а.в.) яширинган ғор бир нечта ўзига хос хусусиятларга эга бўлган. Аввало, у яшириниш учун қулай бўлган, чунки бир томонда кириш, иккинчи томонда чиқиш жойлари бўлган. Кириш ҳам чиқиш ҳам ғорнинг тубида жойлашган, шу сабабли ғорга энгашиб ёки эмаклаб кириш мумкин бўлган.
Иккинчи томондан, Савр ғорига бекинишнинг бошқа афзалликлари ҳам бўлган. Тоғ ёнбағирларидаги яйловда Амир ибн Фухайр ўз қўйларини ўтлатган, кечқурун эса қўй сути билан Муҳаммад пайғамбар (с.а.в.) ва Абу Бакр (розияллоҳу анҳу)ни меҳмон қилган.
Маккалик бутпарастлар Оллоҳнинг элчисини қатл қилмоқчи бўлган тунда у Абу Бакр билан бирга Маккадан чиқиб, Савр тоғи томон кетган. Тоғга етиб келгач, ғорга биринчи бўлиб Абу Бакр кирган ва заҳарли ҳайвон ёки ҳашаротлар бор-йўқлигини текширган. У ғордаги барча туйнукларни илон ва заҳарли ҳашаротлар кирмаслиги учун ўз тўнининг парчалари билан бекитиб чиққан, сўнг пайғамбар (с.а.в.)ни ичкарига таклиф қилган.
Мато етмагани сабабли очиқ қолиб кетган ягона туйнукни Абу Бакр товони билан бекитган. Оллоҳнинг элчиси (с.а.в.) уйқуга кетган вақтда илон келиб, Абу Бакрнинг товонидан чаққан. Пайғамбар уйғонгач, ярани даволаган.
Улар ғорда ўтказган уч кун давомида Абу Бакрнинг ўғли Абдуллоҳ ҳар куни келиб, Маккадаги янгиликлардан хабардор қилиб турган, Амир ибн Фухайр эса сут билан сийлаган. Тўртинчи куни эрталаб Оллоҳнинг элчиси (с.а.в.) ва Абу Бакр (розияллоҳу анҳу) Абдуллоҳ ибн Урайкит ҳамроҳлигида туяда Мадинага жўнаб кетган.
Изоҳ (0)