Ўзбекистонда 2017 йили қўшимча 175 та ички ишлар бўлинмалари ва 824 та таянч пунктлари ташкил этилди. Профилактика инспекторлари сони 1102 нафарга оширилди, ИИВ ҳузурида Тергов департаменти, жойларда эса суриштирувчилар институти шакллантирилди. Бу ҳақда Ички ишлар вазири Пўлат Бобожонов ЎзА мухбири билан суҳбатида маълум қилди.
— 2017 йилда мамлакатда 73692 та жиноят рўйхатга олинган бўлиб, аввалги йилга нисбатан 13720 тага ёки 15,7 фоизга камайишга эришилди, — дейди Пўлат Бобожонов. — Хусусан, қотиллик 22, қасддан баданга оғир тан жароҳати етказиш 7,1, номусга тегиш 21,8, босқинчилик 22,8, талончилик 21, ўғирлик 6,6, фирибгарлик 5,7, безорилик 37,9, транспорт воситаларини олиб қочиш 6,2 фоизга камайди.
Жиноятчиликнинг барвақт олдини олишда ва содир бўлган жиноятнинг ўз вақтида фош этилишини таъминлашда ҳудудий профилактика инспекторлари муҳим ўрин тутмоқда. Бунда уларнинг шахсий масъулияти кучайтирилиши билан бир вақтда ижтимоий муҳофазаси ҳам тубдан яхшилангани муҳим аҳамият касб этди.
Президент ташаббуси билан амалга оширилган ушбу ишлар натижасида ўтган йил давомида республикадаги мавжуд 8973 маҳалланинг 1079 тасида умуман жиноят содир этилмади.
Профилактика инспекторлари ҳақида гап кетса, улар фаолиятидан қониқмаслик ёки уларни фақат танқид қилиш ҳолатлари кўпроқ кузатилади. Бироқ, улар кўпинча осойишталик учун тунни тонгга улаб хизмат қилишини унутмаслик лозим. Уларнинг кўпчилиги зарур бўлса, хизмат вазифасини бажариш чоғида жонини ҳам аямайди.
Жумладан, 2017 йил 13 декабрь куни Тошкент шаҳар, Миробод тумани, Мироншоҳ 8-тор кўчаси бўйлаб ўтган катта босимдаги сув қувури ёрилиб кетгани туфайли шу кўчадаги 18 хонадонда яшовчи аҳоли қайноқ сув гирдобида қолди. Воқеа жойига тезлик билан етиб келган профилактика инспектори лейтенант Ислом Бекназаров 27 фуқаронинг ҳаётини сақлаб қолди, ўзи эса жароҳат олди.
Изоҳ (0)