Атоқли олим, навоийшунослик илмининг етук намоёндаларидан бири, Ўзбекистон Республикаси Фанлар академияси академиги, Ўзбекистон Республикаси фан арбоби, филология фанлари доктори Азизхон Қаюмов 93 ёшида вафот этди, деб хабар берди ЎзА.
Азизхон Қаюмов – 1926 йил Қўқон шаҳрида дунёга келган.
1949 йил Ўрта Осиё давлат Университетининг Шарқ факультетини тугатган. 1949 йилдан бошлаб Шарқ қўлёзмаларини ўрганиш институтида кичик илмий ходим, Шарқшунослик институтида илмий котиб, Тил ва адабиёт институтида директор лавозимларида ишлади. 1954 йилда фан номзоди, 1961 йилда эса докторлик диссертацияларини ўзбек адабиёти тарихи мавзулари асосида ҳимоя қилди.
1961—1979 йиллар орасида илмий фаолиятни турли давлат идораларида масъул лавозимларда ишлаш билан бирга амалга оширган. 1979—1998 йилларда Қўлёзмалар институти директори лавозимида, 1998 йилдан то шу кунга қадар Алишер Навоий номидаги давлат Адабиёт музейида етакчи илмий ходим бўлиб ишлаб келган.
Азиз Қаюмов 1989 йил Ўзбекистон Фанлар Академиясининг мухбир аъзоси, 1995 йил эса академиги бўлди. 1983 йил «Ўзбекистонда хизмат кўрсатган фан арбоби» ҳамда Беруний номидаги Давлат мукофотига сазовор бўлди.
Азиз Қаюмов раҳбарлигида кўплаб фан номзодлари ва фан докторлари етишиб чиққан бўлиб, улар ҳозирги кунда республиканинг илмий ҳаётида ўзларининг муносиб ўринларини эгаллаб келмоқда.
Азиз Қаюмовнинг хизматлари давлат томонидан юксак баҳоланиб, «Эл-юрт ҳурмати» (2003), «Ўзбекистон белгиси» (1995), «Шуҳрат» медали (1995) «Буюк хизматлари учун» ордени (2014) каби мукофотлар билан тақдирланган.
Эслатиб ўтамиз, Академик жорий йилнинг январида Тошкент ҳокимига очиқ хат ёзиб, Давлат адабиёт музейининг хусусийлаштириб бериб юборилган қисмини яна музейга қайтаришни сўраган эди.
Изоҳ (0)