2017 йилги мавсум футболчилик фаолиятини якунлаб, бутсаларини михга илган Тимур Кападзе Ўзбекистон миллий терма жамоасига вақтинча бош мураббий этиб тайинланди.
ЎФА матбуот хизматининг хабар беришича, ташкилот номи сир тутилаётган хорижий мутахассис билан оғкази келишувга эришиб бўлган. Бироз вақт ўтиб, барчаси расмий кўринишда ҳал этилади ва миллий терма жамоага расман бош мураббий тайин қилинади. Кападзе эса орадаги бўшлиқни тўлдиришга ҳаракат қилади.
Ўзбекистон миллий терма жамоасини март ойининг сўнгги 10 кунлигида 2 та халқаро ўртоқлик ўйини кутиб турибди. 23 март куни ЖЧ—2018 иштирокчиси ҳисобланган Сенегалга қарши ўйин бўлиб ўтса, 27 март куни ўзбекистонлик футболчилар Марокашга қарши саф тортади. Ҳар икки беллашувга Касабланка шаҳри мезбонлик қилиши кўзда тутилган.
Тимур Кападзе мана шу ўйинларга футболчиларни тайёрлаб боради ва яқин кунлар ичида терма жамоанинг кенгайтирилган мураббийлар штабини футбол ассоциацияси раҳбариятига тақдим этади.
Қайд этиш керак, ОФК клублар мураббийлари ва терма мураббийларининг қитъа миқёсидаги расмий ўйинлари учун белгилаб қўйилган лицензияларни талаб қилади. Ўзбекистон миллий терма жамоасини ЖЧ—2018 стартига қадар ҳеч қандай расмий ўйинлар кутиб турмаяпти. Шундан келиб чиқиб, Кападзе ўртоқлик ўйинларига жамоани бош мураббий сифатида бошлаб чиқиши мумкин. ОФК миқёсидаги расмий ўйинлар бошлангунига қадар эса бош мураббий масаласи тўлиқ ҳал этилади.
Тимур Кападзе фаолиятини Фарғонанинг «Нефтчи» жамоасида бошлаган. Кейинчалик «Пахтакор», «Бунёдкор», «Инчхон» (Жанубий Корея), «Шаржа» (БАА), «Актобе» (Қозоғистон), «Локомотив» (Тошкент) клубларида тўп сурган. У Ўзбекистон миллий терма жамоаси таркибида 119 та ўйин ўтказган.
Изоҳ (0)