Жорий йилнинг 4 февраль куни Сурхондарё вилояти Фавқулодда вазиятлар бошқармасининг «1050» қутқарув хизматига Термиз шаҳрида яшовчи фуқаро С.Б. томонидан мурожаат келиб тушди, дея хабар бермоқда Фавқулодда вазиятлар вазирлиги.
Олинган маълумотга кўра, фуқаро С.Б.нинг уйининг темир эшиги беркилиб қолганлиги, 13 ёшли боласи уйда ухлаб ётганлиги, чой дамлаш учун газга сув қўйганлиги ва эшикни тақиллатса ҳам ҳеч ким жавоб бермаётганлиги сабабли хавотир олаётганлиги маълум бўлган.
Қутқарувчилар зудлик билан Ёнғин хавфсизлиги хизмати ва Тез тиббий ёрдам хизмати ходимларини жалб қилиб, воқеа жойига ўз вақтида етиб борди.
Қутқарув гуруҳи томонидан эшик очилганда, кондиционер уланган розетка эриши натижасида уйнинг ичи тутун билан тўлганлиги ҳамда у ерда ўсмир бола ҳушсиз ётганлиги аниқланди. Қутқарувчилар болани тезкорлик билан тез тиббий ёрдам ходимларига олиб чиқди ва унга биринчи тиббий ёрдам кўрсатилди. Ҳозирда боланинг аҳволи яхши.
Изоҳ (0)