«Сарпога турк моли ўрнига қаердаги Ғиждувоннинг нарсаларини жўнатибди». Навоийда куёв сарпо сабаб тўйни тўхтатди (видео)

Навоий вилоятида куёв сарполардан кўнгли тўлмагани сабаб, тўйни тўхтатди. Бу ҳақда «Ёшлар» телеканалининг «Давр» информацион дастурида маълум қилинди.

Сарпо олди-бердисига қадар (тўй ҳали бўлмаган) куёв ва келин ўз никоҳини ФҲДЁ бўлимида қайд эттириб бўлган. Келишмовчиликдан сўнг, никоҳ ФҲДЁда бекор қилинган.

«Давр»да сарпо сабаб никоҳини бекор қилдирган йигитнинг қисқа интервьюси намойиш этилган (лавҳада унинг юзи кўрсатилмаган).

Сарпокийди маросимларида турк моли олиб келади, деб ўйлагандим. Ўзига тўқ оиланинг қизи, акалари, ота-оналари катта-катта жойларда ишларди.

Ўртоқларимнинг сарпокийди маросимларига борганимда, келин томон ҳар хил яхши-яхши турк молларини олиб келганди. Менга ҳам шунақа қилишади, деб ўйлагандим.

Лекин қарасам, менга қаердаги Ғиждувоннинг нарсаларини, пасткашлик қилиб, ҳар хил бўлмағур нарсаларни олиб келди.

Олиб келган нарсаларини онам билан қайтариб, уйига элтиб бердик.

Тўйи бўлмай ажрашган навоийлик йигит