Наманган вилоят ҳокимлиги шаҳар ва туман давлат хизматлари марказларига 12 та Damas автомобилини топширди. Шу муносабат билан Намангандаги «Уч фаввора» хиёбонида ўтказилган маросимда Адлия вазирлиги, вилоят ҳокимлиги, давлат ва жамоат ташкилотлари, ОАВ вакиллари иштирок этди. Бу ҳақда ЎзА хабар берди.
Президентнинг 2017 йил 12 декабрдаги «Аҳолига давлат хизматлари кўрсатишнинг миллий тизимини тубдан ислоҳ қилиш чора-тадбирлари тўғрисида»ги фармонига биноан Адлия вазирлиги ҳузурида Давлат хизматлари агентлиги ва агентликнинг вилоятлардаги шаҳар ва туман марказлари ташкил этилди.
Жисмоний ва юридик шахсларга давлат хизматлари кўрсатиш ягона давлат сиёсатини амалга ошириш, ортиқча маъмурий тартиб-таомилларни бартараф этиш, аҳолига тез, қулай ва сифатли давлат хизматлари кўрсатиш тартибини такомиллаштириш ҳамда идоралараро электрон ҳамкорликни ривожлантириш мазкур тузилмаларнинг асосий вазифаси этиб белгиланди.
— Бу Президент томонидан илгари сурилган «Халқ давлат идораларига эмас, давлат идоралари халқимизга хизмат қилиши керак», деган улуғвор ғояни руёбга чиқаришга хизмат қилади, — дейди Адлия вазирлиги ҳузуридаги Давлат хизматлари агентлиги директори Х.Тўрахўжаев. — Масалан, Наманганда энг олис қишлоқдан вилоят марказига келиш учун 100 километрдан зиёд масофани босиб ўтиш керак. Шунча йўлдан келган фуқаронинг иши бир кунда бица — яхши, акс ҳолда, унинг қанча вақти, маблағи беҳуда сарф бўлади.
Агентлик ва унинг марказларини ташкил этишдан кўзланган мақсад давлат хизмати идораларини халққа яқинлаштиришдир. Мана, кеча биз вилоятнинг энг олис қишлоқларидан бири — Нанайда бўлдик ва рўйхатга олиш бўйича тўпланиб қолган ўнлаб муаммолар жойида ҳал этилди. Давлат хизматлари маркази кадастр дейсизми, нотариус ва ёки бошқа давлат хизмати идораларими, барчасини энг олис қишлоқларгача етказиб боради. Ҳатто абитуриентлардан ҳужжат қабул қилиш ҳам мобил хизматлар кўрсатиш орқали амалга оширилади.
Изоҳ (0)