Ўзбекистонда амалда бўлган биометрик паспортлар хорижга чиқиш паспортлари деб тан олинмайди. Хорижга чиқиш учун алоҳида паспортлар берилади. Бу ҳақда Вазирлар Маҳкамаси ҳузуридаги Давлат персоналлаштириш маркази директори Нажмиддин Тўрахўжаев «Газета.uz» нашрига маълум қилди.
Марказ директори мамлакатнинг деярли бутун аҳолисига бериб бўлинган жорий паспортлар хорижга чиқиш паспортлари деб эътироф этила олмаслиги сабабларини тушунтирди.
«Чет элга чиқиш ҳужжатини расмийлаштириш тартиби ички паспортни расмийлаштириш тартибидан фарқ қилади», — деди у. Бундан ташқари, чет элга чиқш паспорти ҳам тузилиши, ҳам саҳифалари сони бўйича фарқланади.
Ички паспортга барча фуқаролар эга бўлиши керак, бунда уларнинг хорижга чиқиши борасидаги чекловлар, шу жумладан, тергов ишларига боғлиқ чекловлар назарга олинмайди, деди Нажмиддин Тўрахўжаев.
Чет элга чиқиш паспортлари ҳар бир давлат хавфсизлиги учун зарур, чунки давлат четга чиқаётган ҳар бир фуқаро учун жавобгардир. Бу Халқаро фуқаролик авиацияси ташкилоти талабларида ҳам кўзда тутилган. «Шунга ўхшаш жиддий нюанслар кўп», — дея таъкидлади Давлат персоналлаштириш маркази раҳбари.
ИД-карталар жорий қилиниши ҳақида гапирар экан, Нажмиддин Тўрахўжаев 20 мартгача идентификация карталарини босқичма-босқич киритишни кўзда тутувчи ҳуқуқий-норматив ҳужжат лойиҳаси ишлаб чиқилишини айтди.
«Биз ИД-карталар жорий этилишини тўлиқ қўллаб-қувватлаймиз, улар фойдаланиш учун қулай. Аммо тегишли инфратузилмани яратиш учун бироз вақт керак, технологик жараёнларни ҳисобга олиш керак», — дея аниқлик киритди у.
Адлия вазирининг биринчи ўринбосари Нодиржон Жўраев ИД-карталар босқичма-босқич тарзда жорий паспортлар ўрнини эгаллашини тасдиқлади. Паспортлар муддати тугаб бориши билан фуқароларга идентификация карталари шахсни тасдиқловчи расмий ҳужжат сифатида берилади.
Эслатиб ўтамиз, аввалроқ Ўзбекистон ичида яшаш ва ҳаракатланиш учун шахсни тасдиқловчи идентификацион карталар (ИД-карта) жорий этиш кўзланаётгани хабар берилган эди. Бу ҳақдаги Президент фармони лойиҳаси апрель ойининг охирига қадар тайёрланиши лозим, янги тартиб эса 1 июлдан жорий этилади.
2017–2021 йилларда Ўзбекистонни ривожлантириш бўйича ҳаракатлар дастурида чет элга чиқиш паспортларининг жорий этилиши ҳамда чет элга чиқиш учун икки йиллик стикернинг бекор қилиниши кўзда тутилган эди.
Август ойида, идоралараро ишчи гуруҳ томонидан тегишли таклифлар ишлаб чиқилгач, Президент 2019 йил 1 августдан чет элга чиқиш учун биометрик паспорт жорий этилишини белгилади. Амалдаги паспортлар фақат мамлакат ичида қўлланилиши кўзланган эди.
Изоҳ (0)