Самарқанд вилояти Оқдарё тумани маркази — Лойиш шаҳарчасидаги фотосуратга муҳрланган икки қаватли уйлар ўтган асрнинг 80 йилларида қурилган. Бу ҳақда ЎзА хабар бермоқда.
Уйларнинг ташқи кўриниши ва ҳар бир хонадон деразаси ёки деворидан мўри, турли қувурлар чиқариб қўйилгани, ҳовлининг тартибсизлиги ичкаридаги шароит қай даражада эканини кўрсатиб турибди.
— 9 «А» уйга кўчиб келганимизга 30 йилдан ошди, — дейди Зебинисо Қодирова. — Авваллари марказлашган ичимлик суви ҳам, оқова тармоғи ҳам бор эди. Болаларимни ҳеч бир қийинчиликсиз катта қилганман. Афсуски, бугунги кунда хонадонларимиздаги шароит ҳавас қилгулик эмас. Уйларни газ печи, плита орқали иситамиз. Шунинг учун ташқарига мўри чиқарганмиз. Оқова тизими ишламаслиги сабабли ҳар бир хонадон уй ёнида ўзи учун чуқур қазиган ва оқовани шу ерга чиқаришга мажбур. Ичимлик суви учун ҳам ўзимиз ҳовлида қўлбола насослар ўрнатиб олганмиз. Ҳовлидаги умумий хожатхонага кириб бўлмай қолганидан кейин уни ҳам ҳар ким ўзига алоҳида қура бошлади.
Икки-уч йил олдин ушбу кўп қаватли уйлар ҳовлисида қурилган ноқонуний бино ва иншоотлар бузилгач, бу ер ҳам бутунлай қаровсиз ҳолатда қолган. Энг ёмони, ариқлар кўмилиб кетгач, уйларнинг томидан тушадиган сув ҳовли ва йўлакларда тўпланиб қоладиган бўлган. Бу муаммонинг ечими сифатида, ҳеч бир меъёрга тўғри келмаса-да, уй ёнида катта хандақ қазилган. Ҳамма тарафи очиқ ва айни пайтда чиқиндихонага айланаётган бу чуқурлик шу ерда яшовчи аҳоли, айниқса, болалар саломатлиги ва ҳаётига хавф туғдириши ҳисобга олинмаган.
Уй эгалари ушбу масалалар юзасидан бир неча бор туман ҳокимлиги ва бошқа идораларга мурожаат қилгани, лекин натижа йўқлигини айтишди. Бевосита шу кўп қаватли уйларга хизмат кўрсатувчи уй-жой мулкдорлари ширкати фаолиятидан эса аҳолининг аксарияти бехабар. Аҳоли ўз уйи, турмуши ободлиги учун ҳамма нарсага тайёр, фақат уларнинг бошини бириктириш, муаммоларга биргаликда ечим топиш лозим.
Изоҳ (0)