Тарас Шевченко номидаги Киев миллий университети иссиқлик ва электр энергияси учун маблағ етишмаслиги сабабли машғулотларни бекор қилди ва талабаларни баҳорга қадар қўйиб юборди. Бу ҳақда Украинанинг энергетика ва коммунал хизматлар бўйича собиқ ходими маълум қилган.
Маълум қилинишича, бу расман «масофавий таълим» деб аталмоқда, бироқ бунинг учун методика ва малака мавжуд эмас. Талабалар эса дам олишни ва ишлашни режалаштирмоқда.
Университет талабалари дарсларнинг бекор қилинганини тасдиқлаган. Уларнинг айтишича, февралда қандайдир масофавий таълим бўлади, бироқ қандай бўлишини ҳеч ким билмайди. Методистларнинг айтишича, таълим муассасасида машғулотлар 1 мартгача бошланмайди.
Университет томонидан маълум қилинишича, баҳоргача масофавий таълимга ўтишни талабаларнинг ўзи бир йил аввал сўраган. Режа тузилган бўлиб, унга кўра, қишки таътил 1 январдан 24 январгача давом этади, 24 январда эса талабалар иккинчи семестрни бошлаши керак.
Аудиториядаги ўқишлар эса 1 мартда қайта бошланади. Университетнинг хабарига кўра, 24 январдан 28 февралгача талабалар университетдан ташқарида ўқув ва ишлаб чиқариш амалиётини ўтайди, мустақил ишларни бажаради, курс ва диплом ишларини ёзади. Шунингдек, таъкидланишича, коммунал хизматлар учун январь ойидаги тўловлар белгиланган тартибда амалга оширилган, февраль ойи учун эса қисман олдиндан тўлов қилинган.
«Украинская правда»нинг маълумотларига кўра, бунга ўхшаш ҳолатлар Тернополь, Черновци, Днепр ва Одессадаги олий таълим муассасаларида ҳам юз бермоқда.
Изоҳ (0)