Биткоиннинг нархи маълум кишиларнинг ҳаракатига боғлиқ бўлиб чиқди

Тел-Авив университети тадқиқотчиларининг маълум қилишича, биткоин бозорига таъсир ўтказиб бўлмаслиги ҳақидаги фикрларга қарамасдан, баъзи гуруҳлар ёки алоҳида кишилар криптовалюта қийматининг кескин ўзгаришига олиб келувчи бозор манипуляциясини юзага келтира олади. Бу ҳақда «Интерфакс» хабар берди.

Криптовалютанинг биржа савдоларида кўп сонли субъектларнинг иштирок этиши сабабли шу вақтга қадар алоҳида кишиларнинг манипуляцияси биржада криптовалюта нархига жиддий таъсир қлиа олмайди, деб ҳисобланарди.

Тадқиқотчиларнинг аниқлашича, бир кишига тегишли бўлган Markus ва Willy савдо роботлари Mount Gox биржасида 2013—2014 йилларда мавжуд биткоинлар савдосининг 70 фоизида иштирок этган. Маълум бўлишича, биржада криптовалюта нархининг тез ўсган вақтида савдода Markus ва Willy роботлари иштирок этган.

Савдо роботлари бозор ҳаракатига боғлиқ равишда савдоларга қўшилган. Роботлар тасдиқланган ва текширилган ўтказмаларни амалга оширган бўлса ҳам, бевосита улар томонидан сотиб олинган ва сотилган биткоинлар назорат қилинмаган. Markus ва Willy савдоларда иштирок этган вақтда биткоин қиймати кунига ўртача тўрт фоизга ўсган. Роботлар манипуляцияси натижасида уларнинг эгаси 600 мингдан ортиқ биткоинни қўлга киритган бўлиб, уларнинг ўша вақтдаги қиймати 188 миллион долларни ташкил қилган.